Qar basyp qalǵan aýylda tolǵaǵy qysqan 3 júkti áıelge kómek kórsetildi
NUR-SULTAN. QazAqparat - QR ІІM TJK joly jabylyp qalǵan aýyldarda turatyn júkti áıelderge kómek kórsetti, dep habarlaıdy QazAqparat tilshisi.
23 qańtar kúni saǵat 17:57-de Nur-Sultan qalasyndaǵy Apattar medıtsınasy ortalyǵy fılıalynyń dıspetcherlik pýnktine Aqmola oblysy, Tselınograd aýdany, Qaraótkel aýylyndaǵy aıaǵy aýyr áıeldiń tolǵaǵy bastalǵany týraly habarlama kelip túsken.
«Áıeldi dereý perzentzanaǵa jetkizý kerek boldy. 3 mınýt ishinde qajetti tehnıka men Apattar medıtsınasy ortalyǵynyń qyzmetkerleri jumyldyrylyp, jolǵa shyqty. Aýa raıy jaǵdaıy qolaısyz bolǵandyqtan aýylǵa deıin jol talǵamaıtyn kólikpen jetip, ary qaraı TREKOL kóligimen jettik. Alǵashqy medıtsınalyq kómek kórsetilgen soń áıeldi perzenthanaǵa jetkizdik. Aýylǵa barar kezde arnaıy top qurylyp, ony podpolkovnık Bolat Hamzın basqardy. Olar oqıǵa ornyna tez jetý úshin qandaı joldarmen júrý kerek ekenin aıtyp, jedel habarlap otyrdy. 24 qańtar kúni tańǵy saǵat 05:20-da Qaraótkel aýylynan kelgen júkti áıel ómirge ul alyp keldi. Jalpy 23 qańtar kúni aýa raıy qolaısyzdyǵyna baılanysty bizdiń kómegimizben úsh júkti áıel perzenthanaǵa jetkizildi», - deıdi Nur-Sultan qalasyndaǵy TJD-nyń aǵa ofıtseri, podpolkovnık Eldor Raıymbekov.
Tolǵatqan áıeldi perzenthanaǵa alyp kelgen kezde Aqmola oblysy, Tselınograd aýdany, Qyzylsý aýylyndaǵy taǵy bir júkti áıeldi perzenthanaǵa jetkizý kerektigi týraly habarlama túsedi.
«Qyzylsý aýylyna barar joldy qar basyp qalǵandyqtan, jol tańdamaıtyn tehnıkamen júrý de qıyn boldy. Ony perzenthanaǵa birneshe saǵatta jetkizdik», - deıdi ol.
Jedel áreket etý brıgadasynyń dárigeri Sánkeı Gúljaına júkti áıelderdiń densaýlyq jaǵdaıy týraly aıtty.
«Qaraótkelden kelip bosanǵan áıel men sábıiniń densaýlyq jaǵdaılary jaqsy. Ony eki saǵat ishinde perzenthanaǵa jetkizdik. Bizdiń mekemede qajet bolǵan jaǵdaıda bosandyryp alýǵa arnalǵan qurylǵylar bar jáne barlyq jaǵdaıda alǵashqy medıtsınalyq kómek kórsete alamyz. Qyzylsý aýylyndaǵy júkti áıeldi baryp-kelýimizdi qosqanda 8-9 saǵatta perzenthanaǵa alyp keldik. Qazir ol tolǵaq ústinde. Jylpy osyndaı qolaısyz aýa raıy jaǵdaıynda bosaný jaǵdaıy jylyna 3-4 ret bolyp turady», - deıdi Sánkeı Gúljaına.
Qaraótkel aýylynyń turǵyny, dúnıege ul bala alyp kelgen Dınara Qarymsaqova mamandarǵa alǵys aıtty.
«Bul - úshinshi sábıim. Ekinshi balam men osy sábıimniń arasy 8 jyl, ıaǵnı uzaq kútken sábıimiz. Osy mamandar bolmasa úıde bosanyp qalar ma edim», - deıdi ol.
