Qar basqan Qostanaı aýyldarynan medıtsınalyq kómekke zárý jandar shyǵaryldy
QOSTANAI. QazAqparat - Soltústik aımaqtyq aeromobıldi jedel-qutqarý jasaǵynyń qutqarýshylary qar basqan birneshe eldi mekenderden kómekke zárý turǵyndardy shyǵarý boıynsha qutqarý operatsııalaryn júrgizdi, dep habarlaıdy «QazAqparat» HAA tilshisi.
Qostanaı oblysy Áýlıekól aýdany Dıevka kentinen tórt naýqas turǵyn aýrýhanaǵa jetkizildi. Júkti áıel, múgedek jáne dıagnozy anyqtalmaǵan eki turǵyn jáne olardyń týystary jol talǵamaıtyn «TREKOL» kóligimen evkýatsııalandy.
Naýqastar magıstraldi avtojolǵa deıin jetkizildi jáne jedel járdem qyzmetkerlerine tabystaldy.
Odan keıin qutqarýshylar Qarasý aýdanyna baryp, qar basqan jolda turyp qalǵan «KamAZ» kóliginiń eki jolaýshysyna kómek kórsetti. Olardy da jaqyn ornalasqan Qoıbaǵar kentine, jergilikti bılik ókilderine tabystady.
Arqalyq mańyndaǵy Ekindi kentinde júrek talmasy ustaǵan 50 jastaǵy áıelge kómek qajet boldy. Ony da Arqalyq óńirlik aýrýhanasyna «Nıva MARSh - BRONTO» kóligimen evakýatsııalady.
