Qar barysyn túsiretin fototuzaqtardy urlaǵandar qatań jazalanady
ALMATY. QazAqparat - Tabıǵat qorǵaýshylary Іle Alataýyndaǵy qar barystaryn túsiretin fototuzaqtardy urlamaýǵa keńes berdi. Bul týraly qalalyq máslıhat depýtaty Erjan Erkinbaev Instagramdaǵy paraqshasynda málimdedi, dep habarlaıdy QazAqparat tilshisi.
«Búgin qar barysyn qorǵaý qory men zoologııa ınstıtýty júrgizgen monıtorıngtiń alǵashqy nátıjesi jarııalandy. #snowleopardfoundation @snowleopard_kz! Barys kelip sýretke túsip ketti! Múmkindiginshe fototuzaqtardy kóbeıtsek, qyzyl kitapqa engen janýardyń nege azaıyp ketkenin anyqtaı alamyz! Odan bólek obektıvke zańsyz ańshylyq jasaý derekteri, brakonerlerdiń túrleri, kólik nómirleri túsip qalýy múmkin. Asa qorǵaýdaǵy tabıǵat aıasyndaǵy janýarlardy óltirmeńizder, kúshikterin ertken analyqtardy qyrmańyzdar, tún ishinde far qoldanbańyzdar. Ańdy azyq bolatyn kólemnen asyra óltirmeńizder. Fototuzaqtardy da urlamańyzdar, sebebi ol server arqyly sizdiń sýretińizdi ortalyqqa jiberip úlgerýi múmkin. Bul jaǵdaıda jaza qatań bolmaq», - dedi Erjan Erkinbaev.
Onyń aıtýynsha, jazǵa deıin Zoologııa ınstıtýty men Qar barysyn qorǵaý qory birigip úlken jumys atqarmaq. Olar jazǵa deıin ár shatqaldy aralap, barystardyń ómir súrý tsıklin zerttep, genetıkalyq taldaý júrgizýdi josparlanǵan.
«Olar kóp emes. Ary ketse, 30-40 bar shyǵar. Olardyń árqaısysyn túrli qaýipten qorǵaýǵa bolady», - dedi E.Erkinbaev.
Munyń aldynda Almatyda qar barystarynyń popýlıatsııasyn zertteıtin ǵylymı ekspedıtsııa qurylatynyn habarlaǵan bolatynbyz.
Ekspedıtsııa quramyna 10 múddeli adam kiredi. Zertteý uıymy músheleri vıdeo, foto, GPS quralarmen qamtylatyn bolady.
Sonymen qatar, qar barysyn qorǵaý qory Almaty taýlarynda mekendeıtin árbir qar barysyna ID pasport berip, at qoıatynyn jazǵan bolatynbyz.
Odan bólek, jaqynda atalǵan qor túz taǵysyna arnalǵan joıylýdyń az-aq aldynda turǵan qar barysyna arnalǵan zoobaq ashpaq.
