Qar barysy, Dıvan batyr, nındzıa tasbaqalar – Saılaýdaǵy erekshe daýys berýshiler
Máselen Qonaev qalasynyń turǵyny Nurbek Ormanov saılaýǵa oblys ortalyǵynyń bas belgisine aınalǵan barystyń kostıýmin kıip kelgen.
«Egemendi el erteńi jastardyń qolynda, biz jastar ushqyr oıly, jasyndaı jarqyldap tııanaqty eńbek etsek Otanymyzdyń bolashaǵy bıikte bolmaq. Men barys kıimin kıgen sebebim búgingi saılaýǵa ózgeshe ajar bergim keldi jáne Qonaev qalamyzǵa degen bıik qurmetti sımvoly arqyly sýretteýdi qaladym. Biraq búgingi ár azamat óz tańdaýyn jasaǵan aıryqsha sátte bul mańyzdy emes, mándisi daýys berý alańynan eshbir turǵynnyń qalys qalmaýy, óz tańdaýy arqyly bederli bolashaqqa jol jalǵaýy bolmaq», - deıdi ol.
Al taldyqorǵandyqtar saılaý ýchaskesine jelmaıamen jetken.
Túıege minip, daýys berýge kelgender arasynda 35 jastaǵy Ulan Baızaqov ta bar. Ol sońǵy 15 jylda túıe asyraýmen aınalysyp keledi. Ulannyń aıtýynsha, bul janýardy asyraý ońaı emes, degenmen qos órkeshti qasterli maldyń ıesi bolý bir ǵanıbet.
«Aptanyń demalys kúnderi túıemdi ortalyq saıabaqtarǵa alyp shyǵamyn. Ústine mingenine qýanǵan balalardy kórýdiń ózi baqyt. Osyndaı qyzmet kórsetýden tapqan qarajatty túıeniń jem-shóbine, dári-dármegine jumsaımyn. Búgingi saılaýǵa erteletip kelip, daýys berdim. Sebebi kúni boıy túıe baǵymyna qatysty atqaratyn sharýam kóp», - deıdi U. Baızaqov.
Petropavlda kóktemgi sý tasqynynyń aldyn alý maqsatynda qar shyǵarý jumystary qyzǵan. Sondyqtan kommýnaldyq kásiporyn jumysshysy saılaýǵa qatysýǵa traktorymen kelgen. Bolatbek Kárimov tańdaýyn jasasymen-aq dereý jumys ornyna attanǵan.
«Traktorshy bolyp eńbek etkenime 20 jyl. Bizge jaqsy ómir súrý úshin kóp nárse kerek emes, aldymen elde tynyshtyqtyń bolǵanyn tileımiz. Bala-shaǵamyzdy asyraý úshin turaqty jumys, eń bastysy erteńge degen senim kerek. Ózim saılaýdan qalmaýǵa tyrysamyn. Búgin de jumysta júrsem de jarty saǵatqa suranyp, óz tańdaýymdy jasap kettim», - deıdi Bolatbek Kárimov.
Sondaı-aq, Astananyń №10 saılaý ýchaskesine «nındzıa tasbaqalar» daýys berýge kelgen. Osylaısha, Leonardo, Rafael, Donatello, Mıkelandjelo Qazaqstandaǵy saıası ózgeristerge «beı-jaı qaramaıtynyn» bildirdi.
Taǵy bir astanalyq er adam saılaýǵa Dıvan batyr keıpinde keldi. Onyń obrazynan úı kıimin, qýattaǵysh symy bar telefonyn jáne jambasyna jabysqan qyzǵylt dıvanyn baıqaýǵa bolady.
Bul saılaýda elordalyq turǵyndardyń ázil-qaljyńy erekshe baıqalady. Jelide Astanadaǵy saılaý ýchaskeleriniń birinde Adyraspan tútetken áıeldiń de vıdeosy tarady. Bul áreketimen til-kózden, bále-jaladan naqty kimdi qorǵaǵysy kelgeni belgisiz.
Astananyń Oqýshylar saraıyndaǵy №139 ýchaskede bir top qyz-jigit jartylaı jalańash, jazdyq kıimmen daýys berýge keldi. Ony qoǵam belsendisi Nasıma Qorǵanbekova jarııalady.
«Astanada qar jaýyp tur! Bul sýrettiń kúshtiligin baǵamdaı berińiz», - dep jazdy N. Qorǵanbekova.
