Qar barysy «Altyn-Emel» ulttyq parkinde ekinshi ret fototuzaqqa ilikti
Buǵan deıin «Kólsaı kólderi» ulttyq parkinde fototuzaq qar barysyn tirkegenin habarlaǵanbyz. Endi taǵy bir jaqsy jańalyq Qyzyl kitapqa engen erekshe jyrtqysh fototuzaqqa taǵy bir márte ilikti. Bul joly tutas bir otbasy - analyq barys jáne onyń aldyńǵy jyly týylǵan eki kúshikteri baıqaldy.
Bunyń aldynda fototuzaqqa túsken barys atalyq edi. Qazirgi ýaqytta park aýmaǵynda BUUDB-nyń qar barysyn saqtaý jónindegi jobasy iske asyrylýda. Onyń sheńberinde mamandar ulttyq park aýmaǵyna birneshe fototuzaq ornatty.
Ǵalymdardyń aıtýynsha barystyń bul aýmaqta paıda bolýyna 2017 jyldan bastap osy parkte qar barysynyń negizgi qoregi – Sibir taý eshkisine áýesqoılyq jáne trofeılik ańshylyqqa shekteý qoıylǵandyǵy sebep.
Ulttyq parkte qar barysynan ózge de Qyzyl kitapqa engen janýarlardy saqtaý úshin mamandar ulttyq parktiń kúzet aımaǵyna, sondaı-aq Joǵarǵy Kóksý qaýmaly men Oryqty, Túlkili, Qoıandytaý, Toqsanbaı, Atyjoq, Dýlantaý, Ortataý taýlaryna tezdetip ekologııalyq dáliz qurýdy usynady. Bul «Altyn – Emel» taý silemindegi qar barysy popýlıatsııasynyń kedergisiz kóshýine jáne saqtalýyna ǵana emes, sondaı-aq ulttyq parkte arqar, túrkistan sileýsini, sabanshy, Tıan-Shan qońyr aıýy, tas sýsary sııaqty sırek kezdesetin jáne joıylyp bara jatqan janýarlardyń kóbeıýine yqpal etetin bolady.
