Qar aralas jańbyrdan keıin Aqtaý kóshelerin sý basty
ASTANA. KAZINFORM — Aqtaý shaǵyn aýdandary aýmaǵynda qar aralas jańbyr saldarynan jınalǵan sýdy tazalaý baǵytynda jumystar júrgizilip jatyr, dep habarlaıdy qala ákimdiginiń baspasóz qyzmeti
Shaǵyn aýdan ishindegi avtokólik joldary men jaıaý júrginshiler aımaqtarynda sý jınalýdyń aldyn alý maqsatynda arnaıy tehnıka men kommýnaldyq qyzmet ókilderi jumyldyrylǵan.
Atalǵan jumystarǵa 5 assenızator, 10 motopompa jáne 40-qa jýyq kommýnaldyq mekeme qyzmetkeri tartylyp, tazalaý sharalary táýlik boıy, kúndizgi jáne keshki mezgilderde atqarylyp jatyr.
— Qaýipti ýchaskeler turaqty baqylaýda bolyp, qajettilik týyndaǵan jaǵdaıda qosymsha kúshter men tehnıka jumyldyrylady. Qala aýmaǵyndaǵy jaǵdaı ákimdik tarapynan baqylaýda, jumystar bekitilgen josparǵa sáıkes jalǵasyp jatyr, — dedi Aqtaý qalalyq turǵyn úı-kommýnaldyq sharýashylyq bóliminiń bas mamany Áset Baspaev.
Aıta keteıik, qalanyń ózge shaǵyn aýdandaryndaǵy sý sorý sharalary kezeń-kezeńimen jalǵasyn tabady.
Budan buryn Aqtaýda polıtseıler sýǵa batyp bara jatqan jasóspirimdi qutqarǵanyn jazǵanbyz.