Qar aralas jańbyr: Almaty kommýnaldyq qyzmeti kúsheıtilgen rejımde jumys isteıdi

ALMATY. KAZINFORM — Almaty turǵyndaryna jaýyn-shashynǵa baılanysty eskertý jasaldy.

Qala ákimdiginiń málimetinshe, Almatyda 26 aqpan kúni tańerteń jańbyr jaýyp, keshke jaýyn-shashyn qarǵa ulasady dep boljanǵan. Osyǵan baılanysty qalanyń kommýnaldyq qyzmetteri kúsheıtilgen rejımdegi jumysqa aýystyrylady jáne jol jumysshylarynyń táýlik boıy kezekshilikteri uıymdastyrylady.

— Qar jaýa bastaǵanǵa deıin kóktaıǵaqtyń aldyn alý maqsatynda 204 qum taratqyshtyń kezekshiligi uıymdastyrylatyn bolady. Aldyn ala qar jaýar aldynda negizgi magıstraldyq kóshelerdi suıyq reagenttermen óńdeý josparlanǵan. Táýlik boıy 624 birlik arnaıy tehnıka men 1380 jol jumysshysyn tartylady, — dep habarlady ákimdikten.

Budan basqa, joldardyń qaýipti ýchaskelerinde, jol aıryqtarynda muz qatýdyń aldyn alý jáne joıý úshin 46 jedel brıgadanyń kúshimen jol jamylǵysynyń jaı-kúıin qadaǵalaý jónindegi jumys kúsheıtiletin bolady. Aýdan ákimdikterinde jumys óndirisin baqylaý boıynsha táýlik boıy kezekshilik uıymdastyrylady.

— Kólik júrgizý tájirıbesi az adamdar avtokólikpen júrýden bas tartyp, qoǵamdyq kólikke aýysqandary durys. Jaıaý júrginshiler trotýarlarda júrý kezinde saqtyq sharalaryn saqtaýy kerek, — dep eskertedi ákimdikten.

Eske salaıyq, buǵan deıin Almatynyń keıbir aýdandarynda kólik qozǵalysy shektelýi múmkin ekenin jazǵanbyz.