Qapshaǵaılyq qutqarýshy bir kúnde 12 adamdy ajaldan aman alyp qaldy

TALDYQORǴAN. QazAqparat - Almaty oblysy TJD Jedel-qutqarý jasaǵynyń Qapshaǵaı óńirlik qutqarý bólimshesiniń qyzmetkeri Qanat Qalıev bir kúnde 12 adamdy qutqarǵan, dep habarlaıdy QazAqparat.

Qanat bul júıede 2017 jyldan beri jumys isteıdi. Ol ózin joǵary bilikti jáne saýatty maman, uıymdastyrýshylyq qabileti joǵary qyzmetker retinde tanytty. Avarııalyq, izdestirý-qutqarý, súńgýirlik-qutqarý jumystaryn júrgizgende ábjildik pen shyǵarmashylyq tapqyrlyq kórsete biledi.

Bıylǵy 15 shildede Qanat Qamalbekuly Qapshaǵaı sý qoımasynyń jaǵalaýynda patrýlde júrip, 12 adamdy qutqardy. Ol kúni jaǵadan soqqan jeldiń ekpini qatty edi. Tolqynnyń bıiktigi 2 metrge jetti. Biraq Qanat Qalıev aýa raıynyń kúrt nasharlaǵanyna qaramastan sýǵa batyp bara jatqan adamdardy birinen soń birin jaǵaǵa alyp shyqty.

«Qanat Qalıev - teorııa men tájirıbeni, áleýmettik psıhologııany meńgergen oıy ozyq maman. Yntaly jáne oıy ushqyr qutqarýshy. Óz jumysyna ádil baǵa beredi, ózin-ózi únemi jetildirip otyrady» delingen Almaty oblystyq TJD taratqan habarlamada.

Búgingi Qutqarýshylar kúnine oraı Qanat Qamalbekuly «Sýǵa batqandardy qutqarǵany úshin» medalimen marapattaldy.