Qapshaǵaıǵa demalýǵa barǵan úsh jigit tóbelesip, aýrýhanaǵa tústi

QONAEV. QazAqparat – Qapshaǵaı jaǵalaýynda demalmaq bolǵan er adamdar jekemenshik nysannyń ıesi jáne jumysshylarymen tóbelesip qaldy, dep habarlaıdy QazAqparat tilshisi.

Almaty oblysy polıtsııa departamentiniń málimeti boıynsha, 8 sáýirde saǵat 19:03-te Qonaev qalalyq polıtsııa basqarmasyna aýrýhanaǵa túrli dene jaraqaty bar úsh er adamnyń túskeni habarlanǵan. Osy habarlamaǵa sáıkes, QR QK 293-babynyń 2-bóligi 1-tarmaǵynda kózdelgen «Buzaqylyq» qylmystyq quqyq buzýshylyq quramy belgileri boıynsha is tirkeldi.

Tergeý barysynda zardap shekkender Qapshaǵaı jaǵalaýyna demalysqa kelip, jeke aýmaqqa zańsyz kirgeni anyqtaldy. Atalǵan aýmaqtyń menshik ıesi men jumysshylary er adamdarmen sózge kelip, sońy tóbeleske ulasqan. Oqıǵa ornyna polıtsııa jasaǵy jiberildi.

«Oqıǵaǵa qatysýshylar mán-jaıdy anyqtaý úshin polıtsııa basqarmasyna jetkizildi. Іs boıynsha sotqa deıingi tergeýdiń tolyqtyǵyn qamtamasyz etýge baǵyttalǵan barlyq qajetti tergeý áreketteri júrgizilip jatyr. QR Qylmystyq is júrgizý kodeksiniń 201-babyna sáıkes ózge aqparat jarııa etýge jatpaıdy», - dep habarlady polıtsııadan.