Qapshaǵaıdaǵy Zarechnyı aýylyna kógildir otyn keldi
«Qapshaǵaı aımaǵynyń gaz júıeleri» jaýapkershiligi shekteýli seriktestigi Mır, Abaı, Dzerjınskıı, Jambyl kóshelerin kógildir otynǵa qosty.
Saltanatty sharaǵa Qapshaǵaı qalasy ákiminiń orynbasary Ermek Qojahmetov, «Qapshaǵaı aımaǵynyń gaz júıeleri» jaýapkershiligi shekteýli seriktestiginiń dırektory Іlııas Súgirov, Zarechnyı aýyldyq okrýginiń ákimi Berik Dúısenbaev, Zarechnyı aýyldyq okrýginiń jergilikti qoǵamdastyq tóraǵasy Ǵabdesh Qazbekov jáne aýyl turǵyndary qatysyp, ózderiniń aqjarma tilekterin bildirdi.
Alǵashqy gaz qubyry arqyly kógildir otyn jiberýge baılanysty alaýdy aýyl aqsaqaly Baltabaı Jumadilov jaqty.
Aıta keteıik, Almaty oblysynyń 2030 jylǵa deıingi damý jospary daıyndalǵan. Aıasynda Qapshaǵaı óńirin gazben qamtamasyz etý maqsatynda «Baıserke-Qapshaǵaı» jobasy 2017 jyly daıyndalyp, nátıjesinde memlekettik-jekemenshik áriptestik aıasynda ınvestıtsııalyq joba júzege asyrylýda.
