Qapshaǵaıdaǵy kún elektr stansasynda TMD aýmaǵynda teńdesi joq energııa shoǵyrlaý júıesi iske qosyldy (FOTO)
ALMATY. QazAqparat - Búgin Qapshaǵaı qalasyndaǵy kún elektr stansasynda qýaty 2 MVt bolatyn ınnovatsııalyq «EnergyCell» energııa shoǵyrlaý júıesi iske qosyldy.
«Bul ınnovatsııalyq tehnologııa TMD jáne búkil Ortalyq Azııa aýmaǵynda tuńǵysh ret paıdalanýǵa berildi. Ol jańǵyrtylmaly qýat kózderinen alynatyn energııany Qazaqstannyń energııa júıesine anaǵurlym tıimdi biriktirýge baǵyttalǵan. Al bul, turǵyndardy elektr qýatymen jabdyqtaý sapasyn arttyrýǵa múmkindik beredi», - dedi jýrnalısterge bergen suhbatynda «Samruq-Energo» AQ basqarmasy tóraǵasynyń keńesshisi Ǵanı Sálimjýarov.
Bul júıeni AQSh-tyń Sılıkon alqabynda ornalasqan «Primus Power Corporation» kompanııasy jasap shyǵarǵan. Sondaı-aq, atalǵan kompanııa - Reseı-Qazaqstan nanotehnologııa qorynyń seriktesi.
Óz kezeginde «Qazyna Kapıtal Menedjment» AQ basqarma tóraǵasynyń orynbasary Dáýren Ońaev, elimizdegi «Primus Power» jobasyna atalǵan Qor kúni búginge deıin 5 mln. AQSh dollary kóleminde ınvestıtsııa jumsaǵandyǵyn jetkizdi.
«Bul - elektr qýatyn ónerkásiptik deńgeıde saqtaýdyń biregeı júıesi. Jumys isteý merzimi - 25 jylǵa deıin. Eger joba oıdaǵydaı júzege asyrylatyn bolsa, osy baǵytta Qazaqstanda birlesken óndiris orny ashylatyn bolady. Bul jerde jergilikti mazmun 50 paıyzǵa deıin jetkiziledi. Demek, ónimniń baǵasy men onyń logıstıkalyq shyǵyndary arzandaıdy. Al bolashaqta EEO aýmaǵyna eksportqa shyǵarylady», - dedi «Primus Power» jobalaý kompanııasynyń prezıdenti Tom Stepıen.
Aıta ketelik, atalǵan joba Qazaqstanda 2030 jylǵa qaraı jańǵyrtylmaly qýat kózderinen alynatyn elektr energııasynyń úles salmaǵyn 30 paıyzǵa jetkizý jobasy aıasynda júzege asyrylyp jatyr.
