Qapshaǵaıdaǵy kazınolar Qonaev qalasyna qansha salyq tólep otyr
ASTANA. KAZINFORM – Týrızm jáne sport mınıstrligi Qonaev qalasyndaǵy oıyn bıznesi nysandaryn tekserip jatyr. Bul týraly Ashyq NQA portalyna talqylaýǵa shyǵarylǵan Qazaqstan Respýblıkasynda zańsyz oıyn bıznesi men lýdomanııaǵa qarsy is-qımyl boıynsha 2024-2026 jyldarǵa arnalǵan keshendi josparda aıtylǵan.
«Qazaqstan Respýblıkasynyń keıbir zańnamalyq aktilerine oıyn bıznesi máseleleri boıynsha ózgerister men tolyqtyrýlar engizý týraly» 2020 jylǵy 2 shildedegi Qazaqstan Respýblıkasynyń Zańymen (budan ári – zań) býkmekerlik keńseler, totalızatorlar, býkmekerlik keńseler men totalızatorlardyń kassalary Almaty oblysyndaǵy Qapshaǵaı sý qoımasynyń jaǵalaýyndaǵy jáne Aqmola oblysynyń Býrabaı aýdanyndaǵy arnaıy oıyn aımaqtaryna shyǵaryldy. Búgingi kúni 2021 jyldan bastap júrgizilgen profılaktıkalyq, baqylaý jáne tekserý sharalarynyń nátıjesinde 36 oıyn mekemesi, onyń ishinde 28 - býkmekerlik keńse, 6 - totalızator jáne 2 oıyn avtomattary zaly lıtsenzııalardan aıyryldy», - delingen qujatta.
Bıyl naýryz aıynda Týrızm jáne sport mınıstrligi Qonaev qalasynda ornalasqan belgili saýda belgilerimen jumys isteıtin 3 býkmekerlik keńseni jáne 1 oıyn avtomattary zalyn oıyn bıznesi salasyndaǵy zańnamany saqtaý jáne qylmystyq kiristerdi jylystatýǵa (zańdastyrýǵa) qarsy is-qımyl turǵysynan josparly tekserýdi bastaǵan.
«Almaty oblysyndaǵy oıyn aımaǵynyń aýmaǵynda Qapshaǵaı sý qoımasynyń jaǵalaýynda 4 kazıno, 3 oıyn avtomattary zaly jáne 10 býkmekerlik keńse jumys isteıdi. olar 2023 jyldyń aldyn ala qorytyndysy boıynsha jalpy somasy 96 mlrd teńgege salyq tólep, Qonaev qalasynda tikeleı 6 000-ǵa jýyq jumys ornymen qamtamasyz etip otyr», - delingen keshendi josparda.
