Qapshaǵaıda jol jóndeýge bólingen 14 mln teńge jymqyrylǵan – agenttik

NUR-SULTAN. QazAqparat – Jemqorlyqpen kúres qyzmetkerleri Qapshaǵaıda jol jóndeýge bólingen 14 mln teńge jymqyrylý faktisi boıynsha tergeý amaldaryn júrgizip jatyr, dep habarlaıdy QazAqparat tilshisi.

Almaty oblysy boıynsha Sybaılas jemqorlyqqa qarsy qyzmet Qapshaǵaı qalasynyń avtokólik joldary jáne jolaýshylar kóligi bóliminiń laýazymdy adamdaryna qatysty tergeýdi bastady.

Olar «Jumyspen qamtýdyń jol kartasy» memlekettik baǵdarlamasy aıasynda bólingen qarajatqa Zarechnyı aýyldyq okrýgi kósheleriniń jol jabynyna aǵymdaǵy jóndeý jumystaryn júrgizýge mindettelgen.

«JShS-men jasalǵan shart boıynsha is júzinde oryndalmaǵan jumys kólemi úshin oryndalǵan jumystar aktisine qol qoıý jáne aqshalaı qarajatty aýdarý jolymen qarajat jymqyrý kúdigimen sotqa deıingi tergeý bastaldy. Osy istiń saldarynan memleketke 14 mıllıon teńgeden asa iri mólsherde zalal keldi», - dedi Sybaılas jemqorlyqqa qarsy is-qımyl agenttigi 1-shi departamentiniń aǵa tergeýshisi Danııar Bekaıdarov onlaın baspasóz máslıhatynda.

Qazirgi ýaqytta osy is boıynsha tergeý amaldary júrgizilip jatyr.