Qapshaǵaıda jaıaý júrginshini qaǵyp óltirgen júrgizýshi 2,5 jylǵa sottaldy
TALDYQORǴAN. QazAqparat - Búgin Qapshaǵaı qalasynyń soty Darkembaev A. esimdi azamatty 2 jyl 6 aıǵa bas bostandyǵynan aıyrdy, - dep habarlaıdy QazAqparat tilshisi.
Sottalýshy jaıaý júrginshini qaǵyp, jábirlenýshi alǵan jaraqaty saldarynan kóz jumǵan.
QR QK 345 baby 3 bóligi boıynsha kináli dep tanylǵan Darkembaev sonymen qatar jábirlenýshi tarapqa 1 mln teńge moraldyq shyǵyn tóleýge mindetteldi. Sondaı-aq, ol 5 jylǵa kólik júrgizý quqyǵynan aıyryldy.
Esterińizge sala keteıik, shilde aıynda áleýmettik jelide vıdeo jarııalanǵan bolatyn. Ol jerde qarańǵyda jaıaý júrginshi jolynan ótip bara jatqan adamdy kólik qaqqanyn kórýge bolady. Jábirlenýshi alǵan jaraqaty saldarynan aýrýhanada kóz jumdy.
Zańǵa sáıkes, mundaı qylmysty jasaǵan adam 5 jylǵa deıin bas bostandyǵynan aıyrylady. Biraq sottalýshynyń óz kinásin tolyq moıyndap, bolǵan qaıǵyly jaǵdaıǵa qatty ókinetinin, sondaı-aq onyń buryn sottalmaǵany jáne kishkentaı balasynyń bolýy onyń jazasynyń jeńildeýine sebep bolǵan.
Úkim kúshine engen joq.
Sondaı-aq sot jábirlenýshi tarapqa materıaldyq shyǵyndy da óndirýge quqyǵy bar ekenin eskertti. Endi jáberlenýshiler keltirilgen shyǵyndardy dáleldeı otyryp azamattyq sotqa shaǵym túsýrýi qajet.
