Qapshaǵaıda jas qyz sýǵa batyp ketti: demalys aımaǵynyń jumysy toqtatyldy

QONAEV. KAZINFORM — Qonaev qalasynyń ákimdigi Qapshaǵaı sý qoımasynda bolǵan qaıǵyly jaǵdaıǵa qatysty pikir bildirdi.

Ákimdikten málim etkendeı, 7 shilde kúni bolǵan oqıǵaǵa baılanysty Qonaev qalalyq polıtsııa basqarmasy QR QK 306-baby, 3-tarmaǵyna (Qaýipsizdik talaptaryna saı kelmeıtin taýarlardy shyǵarý nemese satý, jumystardy oryndaý ne qyzmetter kórsetý) sáıkes qylmystyq is qozǵady.

Sotqa deıingi tergep-tekserý júrgizilip jatyr. 

— Qaıǵyly jaǵdaı bolǵan demalys aımaǵynyń jumysy ýaqytsha toqtatyldy, — delingen habarlamada.

Jergilikti bılik ókilderi atap ótkendeı, ákimdik tarapynan demalys oryndaryna, jaǵajaılarǵa qatysty monıtorıng jalǵasyp jatyr. 
Onyń barysynda anyqtalǵan kemshilikter quzyrly organdarǵa shara qabyldaý úshin joldanady.

Buǵan deıin prokýratýra, TJB, ákimdik mamandary jaǵajaılarda qyzmet etetin kásipkerlermen birneshe ret júzdesip, barlyq zań talaptaryn túsindirgen bolatyn. 

— Qonaev qalasynda kez kelgen baǵyttaǵy ótinishti, tótenshe jaǵdaılardy habarlaýǵa arnalǵan 109 Biryńǵaı baılanys ortalyǵy jumys istep tur. Turǵyndar men qonaqtardan jaǵajaılar men bıznes oryndarynyń qyzmetine qatysty aryzdardy osy nómir arqyly habarlaýlaryn suraımyz. Budan bólek, elimizde 112 jedel jelisi de jumys isteıdi, — dep habarlady ákimdikten.

Osyǵan deıin Qapshaǵaıda depýtattyń kóz aldynda jas qyz sýǵa batyp ketkeni týraly jazǵanbyz.