Qapshaǵaıda úzdik trıatlonshylar anyqtaldy
QAPShAǴAI. QazAqparat - Qapshaǵaı sý qoımasynyń jaǵalaýynda trıatlonnan «sprınt» qashyqtyǵy boıynsha (750 m júzý, 20 km velojarys, 5 shaqyrym júgirý) trıatlonnan Qazaqstan chempıonaty ótti, dep habarlaıdy QazAqparat tilshisi.
Saıysty qazaqstandyq jáne Almaty qalalyq trıatlon federatsııalary uıymdastyrǵan.
«Chempıonattyń ekinshi kúni Age Group sanatyndaǵy sportshylar kúsh synasty. Elimizdiń túrli aımaqtarynan, Reseı men Ýkraınadan kelgen 18 ben 59 jas aralyǵyndaǵy 120 sportshy 8 jas toptarynda dodaǵa tústi. Sonymen qatar, saıysqa tórt estafetalyq komanda qatysty. Jankúıerlerdiń nazary dodanyń favorıtteri almatylyq sportshylar Maksım Mazýr men Naǵıma Kerimbaevada boldy. Kóshbastaǵan sportshylar jankúıerleriniń úmitin aqtap shyqty. Saıystyń basynan bastap Maksım Mazýr adam sengisiz jyldamdyq alyp, óziniń qarsylastaryna bir de bir múmkindik qaldyrmady. Birinshi júzý kezeńin ótken kezden-aq izine túsken qarsylasynan 4 mınýtqa ozyp keldi. Osyndaı qarqynmen ol velokezeń men júgirýdi ońaı ótip, jalpy qashyqtyqty 1 saǵat 7 mınýtta aıaqtady», - delingen habarlamada.
Aıta ketken jón, Maksım Mazýr - Age Group sanatynyń sportshysy ǵana emes, Almaty Triathlon Federation bas bapkeri. Kúni keshe ǵana ol óziniń oqýshylaryna jankúıer bolyp júrgen edi. Endi búgin ózi de naǵyz sheberligin tanytty.
Áıelder arasynda áıgili almatylyq trıatlonshy, Kaılýa-Konadaǵy Ironman álem chempıonattarynda eki ret márege jetip, Diamond Lady atanyp ketken Naǵıma Kerimbaevaǵa teńdeser eshkim bolmady. Qapshaǵaıdaǵy chempıonatta Naǵıma keremet nátıje kórsetti. Ol «sprınterlik» qashyqtyqty 1 saǵat 18 mınýt 4 sekýndta baǵyndyra bildi.
Estafetalyq komandalar arasynda 1 saǵat 18 mınýt 45 sekýnd nátıjesimen Nur-Sultannan kelgen Arlan Team úzdik atandy.
