Qapshaǵaıda úsh jumysshynyń qazasyna baılanysty tekserý bastaldy
TALDYQORǴAN. QazAqparat - Qapshaǵaı qalasynyń 10-shy káriz-nasos stantsııasynda josparly tazalaý jumystaryn júrgizý barysynda mert bolǵan 3 jumysshynyń qazasyna baılanysty tekserý bastaldy, dep habarlaıdy QazAqparat tilshisi.
«Úsh slesardyń ólimine baılanysty jumys toby quryldy. Eńbek ınspektsııasynyń tarapynan tekserý bastaldy», - dep málim etti Almaty oblysy ákiminiń baspasóz qyzmeti.
Al Qapshaǵaı qalasy ákiminiń baspasóz qyzmeti qaza bolǵan jandardyń tolyq aty-jónin jarııalap, tıisti mekeme tarapynan marqumdardyń jaqyndaryna kómek kórsetiletinin jetkizdi.
«Qazirgi kúni oryn alǵan jaıttyń sebepterin tıisti mamandar men Qapshaǵaı qalalyq ishki ister bólimi jáne medıtsına qyzmetkerleri anyqtap jatyr. Qaza bolǵan 1967 jylǵy Edýard Tıýmenbaevtyń áıeli men qyzyna, 1964 jyly týylǵan Baýyrjan Alıhanovtyń 3 qyzy men jubaıyna jáne 1965 jylǵy Talǵat Ahmetovtyń qyzy men joldasyna «Qapshaǵaı Sý arnasy» MKK basshylyǵy qajetti kómek kórsetip, marqumdardyń jerleý rásimine de kómektesedi» delingen atalǵan vedomstvonyń resmı aqparatynda.
Esterińizge sala keteıik, biz buǵan deıin Qapshaǵaıda káriz qudyǵyn tazalap jatqan úsh jumysshynyń mert bolǵanyn habarlaǵan bolatynbyz.
