Qapshaǵaıda úsh qyzdy sýdan qutqarǵan er adam medalmen marapattaldy

QONAEV. QazAqparat - Qapshaǵaı sý qoımasynda úsh qyzdy qutqarǵan Aleksandr Ananıev QR Tótenshe jaǵdaılar mınıstriniń buıryǵymen «Sýǵa batqandardy qutqarǵany úshin» medalimen marapattaldy, dep habarlaıdy QazAqparat.

A.Ananıevke nagrada Almaty oblystyq Tótenshe jaǵdaılar departamentiniń jáne órt sóndirý qyzmetiniń jeke quramy sap túzegen saltanatty shara barysynda tabystaldy.

Bıylǵy 17 shildede Aleksandr balalarymen jáne nemerelerimen birge demalys aımaǵyna kelgen. Jaǵadan alysyraq júzip júrgen ol, kenet qyz balanyń aıǵaılaǵan daýysyn estigen. Dereý kómekke umtylǵan. Júzip jetken sátte 17-18 jastaǵy úsh qyz sýǵa batyp bara jatqanyn baıqaǵan. Aleksandr sý túbine ketip bara jatqan qyzdardyń biriniń sońynan súńgýge tyrysqanda, úreıi qashqan qalǵan ekeýi oǵan jarmasyp, onysyna mursha bermegen.

«Eki qyz úshin aman qalýdyń sońǵy múmkindigi ekenimdi túsinip turdym. Olar shoshynǵannan meni ustap alyp, jibermedi. Al mıym kompıýter ispetti, úshinshi qyz kúreskenin qoıyp, tuńǵıyqqa ketip bara jatqanyn tirkep turdy. Osy kezde qutqarýǵa bes sekýnd qana ýaqytym qalǵanyn túsindim. Odan ári sýǵa ketken qyzdy taba almas edim», - deıdi búgingi kúnniń batyry.

Keremet kúsh-jigerdiń arqasynda ol ózine ilingen eki qyzdy sýǵa batyrmaı, basymen súńgip, úshinshi qyzdyń qolyn ustap úlgergen. Ol es-tússiz kúıde bolǵan. Solaısha úsheýin de qutqaryp qaldy.

Er adamnyń aıtýynsha, úsh qyzdyń eshbiri aıǵaılamaǵan. Oqıǵa únsizdikte ótken. Kómekke sol mańda sheńbermen júzip júrgen qyz shaqyrǵan. «Eger ol adamdardyń nazaryn aýdartpaǵanda, úsheýi de batyp keter edi», - deıdi Aleksandr.