Qapshaǵaıda urlyq jasady degen kúdikpen buryn sottalǵan tórt adam qolǵa tústi
TALDYQORǴAN.QazAqparat - Qapshaǵaı polıtseıleri páter urlyǵyn jasaǵan kezekti qylmystyq topty qolǵa túsirdi. 25-32 jas aralyǵyndaǵy 4 azamattan quralǵan topty quryqtaý kezinde qylmysty áshkereleıtin aıǵaqzattar tabyldy, dep habarlaıdy QazAqparat tilshisi.
Ustalǵan kúdiktiler Almaty qalasynyń turǵyndary ekeni jáne buryn da osyndaı qylmys jasaǵany úshin qylmystyq jaýapkershilikke tartylǵany anyqtaldy.
«Kúdiktiler Qapshaǵaı qalasynan shyǵa beriste ustaldy. Olardyń avtokóliginen eki noýtbýk jáne qala turǵyndarynan buǵan deıin urlanǵan basqa da zattar tabyldy. Qazirgi ýaqytta kúdiktiler múlikti urlaýdyń 6 deregine qatysy bar degen kúdikke ilinip otyr. Onyń beseýi - Qapshaǵaı qalasynda, bireýi - Zarechnoe aýylynda jasalǵan. Joǵaryda atalǵan qylmystardyń barlyǵy kópqabatty úılerde jasalǵan»,- dep habarlaıdy Qapshaǵaı qalasy polıtsııasy bastyǵynyń orynbasary Azamat Turǵynbaev.
Anyqtalǵan faktiler boıynsha keltirilgen materıaldyq shyǵyn 600 myń teńgeni qurap otyr. Bul is boıynsha búgingi tańda QR Qylmystyq kodeksiniń 188-babyna sáıkes sotqa deıingi tergeý amaldary jalǵasýda. Sonymen qatar, kúdiktilerdiń osyǵan uqsas basqa qylmystarǵa qatystylyǵy tekserilýde.
