Qapshaǵaıda turǵyn úıler men basqa da nysandardy sý basý qaýpi joq - ákimdik
ALMATY. KAZINFORM - Qonaev qalasynda shyǵys baǵyttan sekýndyna 24 metr jyldamdyqpen jel soqty. Saldarynan jaǵajaılarda tolqynnyń áserinen sý kóterildi.
Osyǵan baılanysty qala ákimi Ashat Berdihanov jedel qutqarý jasaǵynyń daıyndyǵyn kórip qaıtty.
«Qazirgi tańda turǵyn úıler men nysandardy sý basý qaýpi joq. Jaǵdaı qala ákimdigi men qalalyq tótenshe jaǵdaılar basqarmasynyń qatań baqylaýyna alyndy», - dep habarlady Qonaev ákimdiginen.
Balqash-Alakól basseındik ınspektsııasynyń málimeti boıynsha, qazir Qapshaǵaı sý qoımasynyń deńgeıi – 478,98 metr, kólemi – 18 mlrd 420 mln tekshe metr.
Іle ózeninen sýdyń ortasha kelýi sekýndyna 586 tekshe metr. Qapshaǵaı GES-nan sýdy jiberý kólemi sekýndyna 900 tekshe metr.
Buǵan deıin áleýmettik jelilerde Qapshaǵaı sý qoımasynyń jaǵajaılarynda sý deńgeıi kóterilgeni kórsetilgen vıdeo taraǵan bolatyn.
