Qapshaǵaıda tórt jáne bes juldyzdy birneshe qonaqúı salynady

ASTANA. KAZINFORM – Bıyl Almaty oblysynda jalpy quny 20 mlrd teńge bolatyn birqatar týrıstik obekti iske qosyldy. Bul týraly óńir ákimi Marat Sultanǵazıev málim etti.

— Ortalyq saıabaq pen Qapshaǵaı kóliniń jaǵajaı aımaqtary jańǵyrtylyp, ótkizilgen iri halyqaralyq is-sharalardyń arqasynda týrıster sany 6,5%-ǵa artty. Kelesi jyly álemdik deńgeıdegi tórt jáne bes juldyzdy brendtik eki qonaqúıdiń qurylysy bastalady. Bul týrızm ınfraqurylymyn halyqaralyq standarttarǵa saı damytýǵa septigin tıgizedi, — dedi Marat Sultanǵazıev óńirdiń áleýmettik-ekonomıkalyq damýy týraly esep bere turyp.

Ákimniń aıtýynsha, Almaty oblysy shet elderden keletin týrıstik aǵyn boıynsha Almaty jáne Astana qalasynan keıin 3-shi orynda tur. 

— Sońǵy eki jylda kelýshiler sany 2 ese ósti, onyń ishinde 128 myń týrıst shetelden keldi. Sonymen qatar, Qytaıda Qazaqstan týrızmi jyly aıasynda Qytaıdan kelgen týrıster aǵyny 1,5 ese ósti. Týrıster aǵynyn ulǵaıtýǵa yqpal etetin jergilikti jáne sheteldik qonaqtarǵa baǵyttalǵan aýqymdy sharalar yqpal etti. Atap aıtqanda, «Tengri ultra» Uly dala marafony, «Qymyzmuryndyq» festıvali, Іle-Balqash regatasy, «TAKLIMAKAN RALLY — 2024», «Race Nation Kazakhstan 2024» taǵy sol sııaqty, — deıdi ol.

Sondaı-aq óńir basshysy bıyl jalpy somasy 20 mlrd teńgege birqatar obekti iske qosylǵanyn aıtty.

— Saýmal terapııasyna basa nazar aýdarylatyn taýly shatqaldardaǵy saýyqtyrý keshenderi bar. Sondaı-aq, Qara kanonda ınvestıtsııa quny 1,5 mlrd teńge bolatyn shyny kópir salý, 58 mlrd teńgege «Oı-Qaraǵaı» kýrortyn keńeıtý sııaqty aýqymdy bastamalar bar. Qonaev qalasynda akvapark salý josparlanýda. Mundaı jobalar aımaqtyń týrıstik tartymdylyǵyn arttyrýǵa, mádenı jáne iskerlik áriptestikti keńeıtýge yqpal etedi, — dep tolyqtyrdy M. Sultanǵazıev.

Buǵan deıin habarlaǵanymyzdaı bıyl Almaty oblysy 63 elge jergilikti ónimdi eksporttady.