Qapshaǵaıda tabylǵan medıtsınalyq qaldyqtar boıynsha ákimdik jaýap berdi
TALDYQORǴAN. QazAqparat - Qapshaǵaı qalasynyń «Shyǵys» yqsham aýdany mańyndaǵy shuńqyrlardan kóp kólemde medıtsınalyq qaldyqtar tabyldy. Dabyl qaqqan turǵyndar tamyrǵa salatyn ıneler men shprıtstardyń shashylyp jatqan vıdeosyn túsirip, áleýmettik jelige júktegen, - dep habarlaıdy QazAqparat tilshisi.
Sol mańda balalar oınap júrgenin aıtqan azamatsha mundaı nemquraılyq adam ómiri men densaýlyǵyna qaýipti dep alańdaýly. Sondaı-aq, shuńqyrǵa jınalǵan sý Qapshaǵaı sý qoımasyna aǵyp, ekologııaǵa keri áserin tıgizýi múmkin dep otyr. Shahar basshylyǵy qazirgi tańda medıtsınalyq qaldyqtardyń ol jerge qaıdan kelgenin anyqtaý úshin tártip saqshylaryna tapsyrma berip, ıneler úıindisiniń kózin joıǵan.
«2021 jylǵy 25 naýryzda Qapshaǵaı qalasynyń turǵyny Shamaeva Marıanna óziniń Instagram áleýmettik jelisindegi akkaýntynan foto-beınematerıaldardy jarııalaǵan bolatyn. Bul Qapshaǵaı qalasynyń «Vostochnyı» jáne 12 shaǵyn aýdandarynyń aralyǵyndaǵy paıda bolǵan kólshikte medıtsınalyq qaldyqtardyń tastalǵany belgili boldy. Munda paıdalanylǵan shprıtster, naýqastarǵa qoıylatyn sıstemalyq zattar, maqta, orama qaǵaz qoraptaryn kórý bolady. Osy málimet habarlanǵan sátten bastap, qalanyń turǵyn úı kommýnaldyq jáne óńirlik kommýnaldyq qyzmetiniń qyzmetkerleri oqıǵa ornyna shyǵyp, foto-beıne tirkeý jáne medıtsınalyq qaldyqtardy jınaý jumystaryn júrgizdi. Sodan keıin, atalǵan medıtsınalyq qaldyqtar talaptarǵa sáıkes tolyqtaı joıyldy.
Qazirgi ýaqytta quqyq qorǵaý organdarynyń qyzmetkerleri osy Ákimshilik quqyq buzýshylyqty jasaǵan belgisiz adamdy nemese uıymdy anyqtaý úshin is-sharalar júrgizýde»,- dep jaýap berdi Qapshaǵaı qalasy ákiminiń baspasóz hatshysy Ardaq Qasymhanova.
