Qapshaǵaıda sýǵa batqan qyz qatty jelde jaǵaǵa jete almaı qalǵan - TJD
TALDYQORǴAN. QazAqparat - Qapshaǵaıda sýǵa batyp, qaıtys bolǵan 21 jastaǵy qyzdyń Esik qalasynan kelgeni belgili boldy. Bul jóninde oblystyq TJD baspasóz qyzmeti málim etti, dep habarlaıdy QazAqparat tilshisi.
«Sýǵa ketken 1997 jylǵy boıjetken Esik qalasynan dostarymen birge sýǵa shomylýǵa kelgen. Olar sýǵa túsip júrgende qatty jel turyp, tolqyn kóterilgen. Sol sátte boıjetken men janyndaǵy eki jigit óz kúshterimen jaǵalaýǵa júzip, jete almaǵan. Olarǵa «Zolotye peskı» demalys ornynyń qutqarýshysy kómekke umtylǵan. Alaıda 1988 jáne 1994 jylǵy eki jigitti ǵana qutqarý múmkin boldy», dep málim etti oblystyq TJD baspasóz qyzmetiniń ókili Azamat Jurtbaev.
Esterińizge sala keteıik, qaıǵyly oqıǵa búgin saǵat 15:50 de boldy.
Qutqarýshylar daýyl soqqanda sýǵa túsýge bolmaıtynyn eskertedi.
