Qapshaǵaıda sý deńgeıi kóterildi: ákimdik tekseris júrgizedi
ALMATY. KAZINFORM – Áleýmettik jelilerde Qapshaǵaı sý qoımasynyń jaǵajaılarynda sý deńgeıi kóterilgeni kórsetilgen beınejazba tarady.
Beınejazbadan jaǵajaı mańyndaǵy joldardy sý alyp jatqanyn kórýge bolady.
«Sý deńgeıi tez kóterilip, óz arnasynan shyǵyp jatyr», – delingen beınejazba.
Atalǵan jaǵdaıǵa baılanysty Qonaev qalasy ákimdiginiń baspasóz qyzmeti túsinikteme berdi.
- Qonaev qalasynda boran soǵýyna baılanysty tolqyn kóterilgen. Jaqyn mańdaǵy úılerdi, aýlalardy sý basqan joq. Qazirgi tańda Qapshaǵaı sý qoımasynan sý jiberý kólemi sekýndyna 900 tekshe metrdi quraıdy. Boran basylǵan soń ákimdik jáne TJB mamandary sý qoımasynyń jaǵalaýyn aralap shyǵady, – dep habarlady ákimdikten.
Eske salaıyq, buǵan deıin Qonaevta shomylý maýsymyna daıyndyq bastalǵanyn jazǵanbyz.
