Qapshaǵaıda soqqyǵa jyǵylǵan oqýshylardyń ata-analary ádildik izdeýde
TALDYQORǴAN.QazAqparat – Qapshaǵaıda 8-9 synyp oqýshylarynyń ata-analary balalaryn belgisiz bireýler azaptap, olarǵa oq atyp, beldikpen uryp-soqty dep shaǵymdanýda. Oqýshylardyń sózinshe, olardy dala zańymen aıaýsyz jazalaǵandar tipti aryz jazdyrǵan. Ol jerde balalarǵa bir jyl boıy temir-tersek ornalasqan aımaqtan temir urladyq dep jazýdy mindettepti, dep habarlaıdy QazAqparat tilshisi.
Tórt oqýshyny belgisiz adamdardyń aıaýsyz sabaǵany sonsha, balalardyń denelerinde beldiktiń izi taıǵa tańba basqandaı qalǵan. Taıaqtyń astynda qalǵan oqýshylardyń sózinshe, olardy kólik qozǵaltqyshynyń rezeńke beldigimen soqqan. Tipti, urlyq jasaǵandaryn moıyndamasa alabaı ıtke azyq retinde beremiz dep qorqytypty. Al polıtsııanyń bergen aqparatyna sáıkes, qazir tórt oqýshy óndiristik bazadaǵy avtobólshekter men túrli temir-tersekterdi urlady degen kúdikpen tergelip jatyr. Qazir osy faktige oraı qylmystyq istiń 188-babyna sáıkes sotqa deıingi tergeý júrgizilýde.
«Qapshaǵaı qalasyndaǵy óndiristik bazalardyń birinde avtobólshekter men túrli temir-tersekterdi urlaý faktisi boıynsha 2004-2005 jyly týǵan 4 jasóspirim kúdikee ilinip otyr. Bótenniń múlkin urlaý faktisi boıynsha (QR QK 188-baby 2-bóligimen) qylmystyq is tirkeldi. Qazir sotqa deıingi tergeý júrgizilýde. Tergeý barysynda bul jetkinshekterdiń qylmysqa birneshe ret barǵany, barýǵa árekettengeni belgili boldy. Sońǵy áreketterinde olardy baza qyzmetkerleri qylmys ústinde baıqap, ustap, quryqtaǵan. Kúdiktiler ózderiniń áke-shesheleriniń qatysýymen suraýǵa alyndy, olar bar kinálaryn birden moıyndady», - dedi Almaty oblystyq Polıtsııa departamenti baspasóz qyzmetiniń ókili Aqbota Ázirbek.
Al aı-kúnniń amanynda balalarymyzdan aıyrylyp qala jazdadyq degen ata-analar bul iste quzyrly organ birjaqtylyq tanytpasa dep suraıdy. Sebebi, eshkimniń de bireýdiń balasyn dala zańymen jazalaýǵa quqy da, qaqysy da joq dep otyr.
«Men Úkimet basyndaǵylardan, barlyq quzyrly mekemeniń basshylyǵynan bul isti qatań baqylaýǵa alýdy ótinemin. Balalarymyzdy azaptap, qınap, uryp-soqqandar jazasyz qalmaýyn ótinemin», - dedi jábir kórgen oqýshy balanyń ata-anasynyń biri Alekseı Ratkeev
Biraq, balalardy naqty kimniń urǵany belgisiz. Oqýshylar olardyń túrlerin ómir boıyna esterine saqtap qalǵandaryn aıtady. Qazir ata-analar balalaryn belgisiz bireýlerdiń qınap, uryp-soǵyp azaptaǵany úshin polıtsııaǵa aryz túsirip, ádil tergelýin tilep otyr.
