Qapshaǵaıda sheteldik stýdent sýǵa batyp ketti
ALMATY. QazAqparat- Qapshaǵaı sý qoımasyna 23 jastaǵy er adam batyp ketti. Aldyn ala boljam boıynsha, ol - Almatydaǵy S. Asfendııarov atyndaǵy Qazaq ulttyq medıtsına ýnıversıtetinde oqyp jatqan Úndistan azamaty, dep habarlaıdy QazAqparat tilshisi.
Almaty oblystyq Tótenshe jaǵdaılar departamentiniń málimetinshe, oqıǵa 7 shilde kúni bolǵan.
«Belgili bolǵandaı, Almaty qalasynan kelgen stýdentter toby Qapshaǵaı sý qoımasynyń jaǵajaıynda shomylyp, qoǵamdyq qutqarýshylardyń eskertýlerine qulaq aspaı, jaǵalaýdan alysqa júzip ketken. Bir sátte stýdentterdiń biri óz kúshin eseptemeı, odan ári júzip, batyp ketken. Qutqarýshylar 1999 jyly týǵan jigittiń denesin taýyp, jaǵaǵa shyǵardy»,- dep habarlady Almaty oblystyq Tótenshe jaǵdaılar departamentinen.
Almaty oblysynyń Tótenshe jaǵdaılar departamenti azamattardan sýdaǵy qaýipsizdik erejelerin saqtaýdy suraıdy.
