Qapshaǵaıda polıtsııa tórt saýna-prıtonnyń jasyryn qyzmetin áshkereledi
TALDYQORǴAN. QazAqparat - Almaty oblysynyń Qapshaǵaı qalasynda jezóksheler qyzmet kórsetetin elıtalyq saýna túrindegi prıton táýlik boıy jumys istegeni anyqtaldy, - dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, ol jerde 38 jastaǵy jergilikti turǵyn monshanyń ákimshisi ǵana emes, klıentterdiń qalaǵanyn taýyp beretin «jeńgetaıdyń» da qyzmetin atqarǵandyǵy belgili boldy.
Aıta keterligi, atalǵan prıtondar karantın tártibi kezinde de zańǵa qaıshy áreketin toqtatpaǵan.
«Syrtynan qaraǵanda jalǵyz qabatty ǵımarat ákimshilik nysanǵa uqsaıdy. Shyndyǵynda ol klıentterge ıntımdik qyzmet kórsetetin oryn bolǵan», - dedi Almaty oblystyq Polıtsııa departamenti bastyǵynyń orynbasary polıtsııa podpolkovnıgi Danııar Mendebaev.
Saýnalarda jezókshelikpen aınalysýǵa arnalǵan prıtonnyń jumys istep jatqany týraly jedel aqparat negizinde tekserý júrgizgen polıtseıler aqparattyń ras ekenine kóz jetkizdi.
«Polıtseıler tekserýge kirip kelgende mekeme ákimshisi aqshalaı syıaqy úshin klıentterge jeńil júristi qyzdardy usyný jáne deldaldyq qyzmet kórsetý ústinde ustaldy. Jeńgetaı áıel 20 myń teńge kóleminde aqsha alý kezinge qolǵa tústi. Barlyq aıǵaq zattar tárkilendi jáne QR Qylmystyq kodeksiniń 309-baby boıynsha qozǵalǵan qylmystyq is materıaldaryna tirkeldi. Al, prıton ákimshisi qylmystyq jaýapqa tartyldy. Qonaqúıden jeńil júristi 8 qyz anyqtaldy. Tulǵalardy esepke qoıý jáne qandaı da bir quqyq buzýshylyqqa qatysy baryn tekserý úshin áıelder aýmaq boıynsha polıtsııa bólimshesine jetkizildi», - dep qorytty podpolkovnık Danııar Mendebaev.
