Qapshaǵaıda muz jarylyp, kóliktegi úsh adam sýǵa kete jazdady
TALDYQORǴAN. QazAqparat - Qapshaǵaı sý qoımasyna balyq aýlaýǵa barǵan adamdar oqys oqıǵaǵa tap boldy. Leksýs kóliginde bolǵan úsh adam sýǵa batyp kete jazdaǵan. Abyroı bolǵanda zardap shekkender joq, dep habarlaıdy QazAqparat tilshisi.
«Aqpannyń 11-nen 12-ne qaraǵan túni Qapshaǵaı sý qoımasyna úsh adam balyq aýlaýǵa barǵan. Jaǵadan 500 metrdeı jerde muz jarylyp, kólik jartylaı sýǵa batqan. Abyroı bolǵanda sol jerdiń tereńdigi 1,5 metr ǵana bolǵan eken. Oqys oqıǵa jaıly habar TJD kezekshilik bólimine 9:32-de kelip tústi. 14:20-da kólikti sýdan alyp shyqty. Tórt qutqarýshy jáne eki tehnıka oqıǵa ornynda júmys istedi. Kóliktiń ishinde bolǵan úsh adam aman. Zardap shekkender joq», dep málim etti oblystyq TJD baspasóz qyzmetiniń ókili Azamat Jurtbaev.
Sondaı-aq qutqarý qyzmetiniń málimetinshe, oqys oqıǵa bolǵan jerde muzdyń qalyńdyǵy 10 sm bolǵan. Al qutqarýshylar kólikpen muzdyń ústimen júrý úshin keminde 30 sm bolý kerektigin eskertti.
