Qapshaǵaıda muz jarylyp, balyqshynyń kóligi sýǵa batyp ketti

QONAEV. QazAqparat - Qapshaǵaı sý qoımasynda muz jarylyp, balyqshynyń kóligi batyp ketti. Endi eskertýdi elemegen balyqshy ákimshilik jaýapkershilikke tartylady,- dep habarlaıdy QazAqparat tilshisi.

«1 qańtar kúni Almaty oblysy TJD qyzmetkerleri Qapshaǵaı sý qoımasynda balyqshylarmen profılaktıkalyq jumys júrgizý kezinde muz ústine jeke avtokóligimen kelgen áýesqoı balyqshylardy baıqady. Olar sý aıdynyndaǵy qaýipsizdik sharalarymen tanysty. Alaıda júrgizýshi departament qyzmetkerleriniń eskertýin elemedi. Keıinnen eń jaqyn mańdaǵy jaǵalaýǵa bara jatqan kezde Mercedes markaly sprınter kóligi muz astyna túsip ketti. Júrgizýshi kólikten shyǵyp úlgerip, aman qaldy, kómek qajet bolmady»,- delingen Almaty oblystyq tótenshe jaǵdaılar departamenti baspasóz qyzmetiniń habarlamasynda.

TJD júrgizýshini QR ÁQBtK 412-baby 1-bóligi boıynsha ákimshilik jaýapkershilikke tartady.

Mamandar turǵyndarǵa sý aıdynynan ótý kezinde qaýipsizdik erejelerin saqtaýǵa keńes beredi.

«Muzdyń juqa jáne álsiz ýchaskelerine kólikpen shyqpańyzdar, muz ótkelderinde balyq aýlaýǵa arnalǵan shuńqyr jasamańyzdar, muzdyń jekelegen ýchaskelerinde toptasyp jınalmańyzdar, muzdaǵy oıyqtar men jaryqtarǵa jaqyndamańyzdar»,- dep tolyqtyrdy vedomstvonyń baspasóz qyzmetinen.

Foto: QR TJM baspasóz qyzmeti