Qapshaǵaıda mektep janynan tabylǵan óli náreste úsh kún buryn týǵan bolýy múmkin - ІІD
TALDYQORǴAN. QazAqparat - 2016 jyldyń 9 tamyzynda Qapshaǵaı qalasyndaǵy №2 mektep gımnazııasynyń stadıonynda balalar jańa týǵan sábıdiń múrdesin tapty. Balalar muny PIK qyzmetkerlerine aıtqan. Olar polıtsııaǵa habar bergen.
Oblystyq ІІD-niń naqtylaýynsha, balalar stadıonda oınap júrip jerde jatqan balanyń aıaǵyn baıqap qalǵan. Bala shúberekke oralǵan, onyń ústin hlor seýip, topyraqpen kómgen.
Oqıǵa ornyna jetken Qapshaǵaı qalalyq ІІB polıtseıleri náreste tabylǵanyn rastady, oqıǵa ornynda krımınalıster jáne qylmystyq izdeý qyzmetkerleri jumys júrgizdi. Náresteniń múrdesi saraptamaǵa jiberildi.
- Kindigi kesilgen, janynda joldasy bolǵan joq. Aýrýhana jaǵdaıynda týǵan bolý kerek. Shamamen úsh kún buryn dúnıege kelýi múmkin, - dep habarlady Almaty oblystyq prokýratýrasy.
Qazir sábıdiń anasyn izdeý sharalary júrgizilýde.
