Qapshaǵaıda kólik urlaýmen aınalysqan qylmystyq top ustaldy
TALDYQORǴAN. QazAqparat - Almaty oblysynyń Qapshaǵaı qalasynda eki adam kólik urlaýmen aınalysty degen kúdikpen ustaldy, dep habarlaıdy QazAqparat tilshisi.
«Qazir ustalǵandardyń 7 kólikti urlaǵandyǵy dáleldenip otyr. Ondaǵy jeti kóliktiń altaýy «Mersedes» markaly, al bireýi «Mıttsýbısı». Mashınalar 2017 jyldyń jeltoqsanynan bıylǵy jyldyń mamyr aıy aralyǵynda urlanǵan. Qazir kúdiktilerdiń basqa da qylmystarǵa qatysy bar-joǵy tekserilip jatyr», - deıdi Qapshaǵaı qalalyq ІІB bastyǵynyń orynbasary, polıtsııa kapıtany Azamat Turǵynbaev.
Anyqtalǵandaı, urlanǵan kólikterdiń basym bóligi tabylyp, zańdy ıelerine qaıtarylǵan. Al kúdikti retinde tergelip jatqan ekeý Talǵar aýdanynyń turǵyndary. Osy fakti boıynsha sot aldy tergeý júrip jatyr. Іspen Qapshaǵaı qalalyq ІІB tergeýshileri aınalysýda.
«Jyl basynan beri Qapshaǵaı qalasynda urlyqpen aınalysatyn 6 top ustaldy. Olardyń deni páter tonaý syndy urlyqpen aınalysqan», - dep tolyqtyrdy oblystyń polıtseıleri.
