Qapshaǵaıda kóldiń ortasynda qalyp qoıǵan balyqshylardy qutqarǵan polıtseı marapattaldy
TALDYQORǴAN. QazAqparat - Qapshaǵaı kólinde muz ústindegi balyqshylardy qutqarǵan polıtseı «Tótenshe jaǵdaıdaǵy erligi úshin» tósbelgisimen marapattaldy, dep habarlaıdy QazAqparat tilshisi.
Qańtar aıynyń sońynda Talǵar aýdany PB Tabıǵat qorǵaý tobynyń ınspektory polıtsııa kapıtany Dastan Berikbaev Qapshaǵaı kólinde arnaıy reıd júrgizý barysynda balyqshylardyń ómirin qutqaryp qaldy.
Kól betindegi muz bólinip, jeldiń kúshimen olardy 7 shaqyrym jerge alyp ketken.
«Brakoner» aldyn alý sharasy barysynda aýmaqty aralap kele jatqanda dúrbiniń kómegimen kól ortasynda kómek surap turǵan adamdardy kórdim. Jergilikti turǵynnyń qaıyǵyn ýaqytsha alyp, kómek kórsetýge keldim. Muz ústinde 5 adam, onyń ishinde 2 áıel bar eken. Qaýipsizdik talaptaryn saqtap, olardy kezekpen jaǵaǵa jetkizdim. Balyqshylardy kóligine jetkizip, aman-esen jolǵa saldym»,- deıdi polıtsııa kapıtany Dastan Berikbaev.
Qapshaǵaı kóline balyq aýlaýǵa kelgender Almaty qalasynyń turǵyndary bolyp shyqty.
Tabıǵı qubylysty esepke almaǵan balyqshylar shatyr ishinde balyq aýlap otyrǵanda muzdyń bólinip, jaǵadan qashyqtap ketkenin baıqamaǵan.
«Men óz áreketimdi erlikke sanamaımyn. Bul – meniń azamattyq mindetim. Kez kelgen tártip saqshysy osylaı jasar edi. Degenmen, eńbegimdi joǵary baǵalaǵan QR Tótenshe jaǵdaılar mınıstrliginiń basshylyǵyna alǵysym sheksiz. Qazaqstan Respýblıkasyna qyzmet etemin!» - dep tolyqtyrdy medal ıegeri kapıtan Dastan Berikbaev.
Búgin Almaty oblysyndaǵy tótenshe jaǵdaılar basqarmasynyń basshylyǵy erligimen erekshelengen polıtsııa ofıtserine alǵysyn aıtyp, omyraýyna medal taqty.
Óz tarapynan aýdandyq polıtsııa basqarmasy da tabıǵat qorǵaýshynyń jetistikterin erekshe baǵalady.
Polıtsııa kapıtany Dastan Berikbaev jaqynda Talǵar aýdanynda arystan asyrap otyrǵan sharýa qojalyqty áshkerelep, tanylǵan bolatyn.
