Qapshaǵaıda qııar men qyzanaq ósiretin jylyjaıdyń aýmaǵy keńeıedi
TALDYQORǴAN. QazAqparat - Almaty oblysynyń ákimi aýmaǵy 5 gektar jerge qııar men qyzanaq ósirip otyrǵan Qapshaǵaıdaǵy «Grın Lend Alataý» JShS-nyń jumysymen tanysty.
Munda ótken jyly 1693 tonna qyzanaq, 1595 tonna qııar ósirilgen, dep habarlaıdy QazAqparat tilshisi óńir basshysynyń baspasóz qyzmetine silteme jasap.
Óndirilgen ónim Qazaqstanmen qatar Reseı memleketinde óz tutynýshylaryn taýyp otyr. Gollandııalyq qural-jabdyqtarmen jabdyqtalǵan jylyjaıda tamshylatyp sýarý ádisi qoldanylady. Seriktestik dırektory Almas Daýytovtyń aıtýynsha, jobanyń ekinshi kezeńi 2018 jyly qolǵa alynady. Tabıǵı gaz tartylǵannan keıin ázirge bos jatqan 15 gektar jerge jylyjaı aýmaǵy keńeıtiletin bolady. 2017 jyly qajetti qujattary men ınfraqurylymyn ázirlep, 2018 jyly qurylysyn bastaý josparda bar.
Sondaı-aq sapar barysynda Amandyq Batalov qalanyń shekarasynda ornatylǵan stendilerdegi aqparattar arqyly jol jıegindegi qurylys nysandarynyń jumysyn jaqsartý jobalarymen tanysty. Qala ákimi Talǵat Qaınarbekov "Almaty-Óskemen" avtojoly boıynyń qalaqurylystyq josparlaý kesheni, "Almaty - Arqarly" telimi, ondaǵy servıstik qyzmet kórsetý nysandarynyń jobalary týraly baıandap, qalanyń kireberisiniń sáýlettik kelbeti jobalaryn da kórsetti.
