Qapshaǵaıda katermen adamdy qaǵyp óltirgen azamat 2 jylǵa sottaldy

ASTANA. KAZINFORM — Qonaev qalasynyń soty Qapshaǵaı sý qoımasynda demalýshynyń qaza tabýyna baılanysty qylmystyq is boıynsha úkim shyǵardy. 

Sottalýshy katerdi basqaryp, jalǵa berý qyzmetin kórsetý barysynda sý kóligi qaýipsizdigin óreskel buzyp, sonyń saldarynan 23 jastaǵy er adamdy mert qyldy.

Onyń áreketi Qylmystyq kodeksiniń 344-babynyń 2-bóligi boıynsha saralandy.

— Tergeý barysynda 2025 jylǵy 2 shildede sottalýshy katermen sý qoımasynyń akvatorııasyna ymyrt ýaqytta, shekteýli kóriný jaǵdaıynda ári jolaýshylar sany da  ruqsat normadan asyp ketkeni anyqtaldy. Sonyń saldarynan ol shomylyp júrgen azamatty qaǵyp ketip, ol alǵan jaraqattarynan qaza boldy, — delingen habarlamada.

Memlekettik aıyptaýshy sotta sottalýshyny 3 jyl merzimge bas bostandyǵynan aıyrý jazasyn taǵaıyndaýdy, sondaı-aq 3 jyl merzimge sý kóligi salasynda qyzmet atqarý quqyǵynan aıyrýdy surady.

Sot úkimimen kináli azamat 2 jyl merzimge bas bostandyǵynan aıyrý jazasy taǵaıyndalyp, sondaı-aq 2 jyl merzimge sý kóligi salasynda qyzmet atqarý quqyǵynan aıyryldy. Sottalýshy sot zalynda qamaýǵa alyndy.

Úkim zańdy kúshine endi.

Aıta ketelik Qapshaǵaıda depýtattyń kóz aldynda jas qyz sýǵa batyp ketken edi. Sonymen qatar Qapshaǵaı jaǵalaýyndaǵy jer telimderi tekserýden ótip jatqany týraly da jazǵan edik.