Qapshaǵaıda qant zaýytyn salý josparlanyp otyr
TALDYQORǴAN. QazAqparat - Almaty oblysynda qant qyzylshasyn egetin sharýalardyń sany jyl sanap ósýde. Máselen 2017 jyly Qapshaǵaı qalasynda 573 gektarǵa tátti túbir egilgen, dep habarlaıdy QazAqparat tilshisi.
Biraq atap ótilgendeı, aýyl sharýashylyǵynyń osy baǵytyna den qoıǵan sharýalardyń túıitkilderi de joq emes. Olar óz ónimderin ótkizý úshin 200 shaqyrymnan astam jol júrýge májbúr.
«Rasymen de, ónim qabyldaıtyn «Kóksý qant» zaýytynyń ornalasqan jeri biz úshin asa jaqyn emes. Osyǵan baılanysty Almaty oblysynyń ákimi Amandyq Batalov Qapshaǵaı mańynan qant zaýytyn salý jóninde tapsyrma berdi. Qazir osy másele boıynsha jumystar atqaryp jatyrmyz. Bolashaqta shaǵyn qant zaýytyn salýdy josparlap otyrmyz», - dedi Qapshaǵaı qalasynyń ákimi Talǵat Qaınarbekov brıfıng barysynda.
Qapshaǵaı qalasyna qarasty Zarechnyı jáne Sheńgeldi aýyldyq okrýgteri bar. Bıyl mundaǵy sharýalar 700 gektar jerge qant qyzylshasyn egýdi josparlaýda.
Aıta ketý kerek, Prezıdenttiń tapsyrmasyna sáıkes Almaty oblysynda qant qyzylshasyn egý qaıta jańǵyrtylýda. 2017 jyly 9 myń gektarǵa tátti túbir egilip, 35 myń tonna taza qant alyndy. Sondaı-aq 10 jyl boıy qańyrap turǵan «Aqsý qant» zaýyty iske qosyldy. Qazirgi tańda Almaty oblysynda tátti túbir qabyldaıtyn eki zaýyt bar.
