Qapshaǵaıda gıdrotsıkl mingen 2 adam jaǵaǵa jete almaı qaldy
ALMATY. QazAqparat - Qapshaǵaıda gıdrotsıkl mingen 2 adam jaǵaǵa jete almaı qalǵan. Oqys oqıǵa 7 tamyzda boldy, dep habarlaıdy QazAqparat tilshisi.
Almaty oblystyq TJD Jedel qutqarý jasaǵynyń habarlaýynsha, jergilikti departamenttiń kezekshi pýltine gıdrotsıkl tizgindegen eki adamnyń Qapshaǵaı sý qoımasynyń ortasynda qalyp qoıǵany týraly habarlama kelip túsken.
Osy oqıǵaǵa qatysty málimetterden belgili bolǵany - Almatydan demalýǵa kelgen eki jigit jaǵadan tym alysqa uzap ketip, gıdrotsıkldiń janarmaıy taýsylyp, jaǵaǵa jete almaı qalǵan.
Almaty oblysy TJD Jedel-qutqarý jasaǵynyń Qapshaǵaı óńiri bólimshesiniń qutqarýshylary arnaıy katermen oqıǵa ornyna baryp, gıdrotsıkldi jaǵaǵa jetkizdi.
«Biz janarmaı jetpeı qalatynyn eskermeı, alys jaqqa uzap ketippiz. Júzip ketýge múmkindik joq. Gıdrotsıklder, qaıyqtar bolmady, eshkim joq, habar bereıik desek. Sol jerde 2 saǵattaı turdyq. Áıteýir 112 nómirine habarlastyq. 10 mınýt ótpeı qutqarýshylar kelip, gıdrotsıkldi súırep jaǵaǵa jetkizdi. Tótenshe jaǵdaı qyzmetiniń jumysyna rızamyz», - dedi jigitterdiń biri.
Keshe Qapshaǵaıdyń ortasynda úrlengen matrastyń artynan qaıyqpen ketip, keıin jeldiń kesirinen óz kúshimen jaǵaǵa jete almaı qalǵan Reseı azamaty qutqaryldy.
