Qapshaǵaıda depýtattyń kóz aldynda jas qyz sýǵa batyp ketti

QONAEV. KAZINFORM – Qapshaǵaı sý qoımasynda jas qyz sýǵa batyp ketti. Bul týraly Májilis depýtaty Baqytjan Bazarbek málim etti. 

Qaıǵyly jaǵdaı kezinde jaǵajaıda Májilis depýtaty Baqytjan Bazarbek te bolǵan. Aıtýynsha, qyzdy sýdan kýágerler alyp shyqqan.

— Jaǵalaýda qaýipsizdikke jaýapty eshkim bolmady. Qutqarýshylar, beınebaqylaý kameralary, qutqarý quraldary, medıtsınalyq qyzmetker joq. Sý qoımasynyń jaǵasy jeke kásipkerlerge berilgen. Qyzdy sýdan kýágerler alyp shyǵyp, alǵashqy kómek kórsetýge tyrysty, — deıdi ol.

Depýtat jaǵajaılardyń kimge tıesili ekenin anyqtap, zań talaptaryn buzǵandardy jaýapqa tartý úshin tekseris júrgizýdi talap etetinin jetkizdi.
Polıtsııa departamenti qyzdyń ólimine qatysty qylmystyq is qozǵalǵanyn habarlady.

— Oqıǵanyń barlyq mán-jaıyn anyqtaý úshin sotqa deıingi tergeý amaldary júrgizilip jatyr. Polıtseıler qutqarý tehnıkasynyń jáne kezekshi qutqarýshylardyń bar-joǵyn, demalys aımaǵynyń belgilengen qaýipsizdik talaptaryna sáıkestigin anyqtaıdy, — delingen habarlamada.

Buǵan deıin Qapshaǵaı sý qoımasynyń jaǵalaýynda 11 jasar balany toq soǵyp, kóz jumǵan bolatyn.