Qapshaǵaıda demalýshylarǵa arnalǵan jańa jaǵajaı ashyldy
TALDYQORǴAN. QazAqparat - Qapshaǵaıdyń qamys basqan jaǵalaýy adam tanymastaı ózgerdi. Bir jyl buryn ǵana jabaıy demalys orny bolǵan aımaqta jańa joldar, jaryq, jaıaý júrginshiler joly, demalys oryndary salynyp, arnaıy avtoturaqtar paıda boldy. Týrıster úshin demalys aımaǵyna kirý tegin, biraq ár kólik demalys aımaǵynan shyqqan ýaqytta 300 teńge tóleýge tıis, dep habarlaıdy QazAqparat tilshisi.
«Jaǵajaıdyń boıynda 200-den astam avtokólikke arnalǵan avtoturaq, jazdyq kafe, saýda núkteleri, jaǵajaı voleıboly men fýtbol ortalyǵy, balalar alańdary, sý attraktsıondary ornalasqan. Onymen qosa, turǵyndardyń qaýipsizdigin qamtamasyz etetin qutqarý stansasy, alǵashqy kómek kórsetý medıtsınalyq bólimshesi syndy 20-dan asa nysan halyqqa qyzmet etedi. Bolashaqta jaǵajaı aýmaǵynda dene shynyqtyrý jáne saýyqtyrý kesheni, muz aıdyny bar sport saraıy sııaqty nysandardy jalǵap turatyn qonaq úı salý kózdelýde. Sondaı-aq, sportty janyna serik etkender úshin tennıs, basketbol ortalyqtary, arnaıy kólemdi sport zaly, 600 orynǵa laıyqtalǵan amfıteatr salynbaq», - dedi jańa jaǵajaıdyń ashylýynda sóılegen sózinde Qapshaǵaı qalasynyń ákimi Talǵat Qaınarbekov.
Jalpy Qapshaǵaı qalasynda 150-ge tarta demalys nysany bolsa, byltyr olar 500 myńǵa jýyq týrıstke qyzmet kórsetken. Al bıyl jańadan ashylǵan jaǵajaıda týrısterdiń legi eki esege deıin artady dep kútilýde.
