Qapshaǵaıda betperde kıip dúken tonaǵan qylmystyq top ustaldy
TALDYQORǴAN.QazAqparat - Almaty oblysynda úsh adamnan quralǵan qylmystyq top dúkenderge qarýly shabýyl jasaǵan. Qazirgi tańda ustalǵan kúdiktiler Qapshaǵaı qalasyndaǵy tórt tonaýǵa qatysy bar degen kúdikke ilinip otyr, dep habarlaıdy QazAqparat tilshisi.
Almaty oblystyq Polıtsııa departamentindegi baspasóz qyzmetiniń málimetinshe, qańtar aıynyń basynda Qapshaǵaı qalasynyń polıtsııasyna belgisiz qaraqshylardan zardap shekken jeke dúken ıeleri shaǵymdanǵan.
Jeke kásipkerler bergen aqparatqa sáıkes tapanshamen qarýlanǵan, betperde kıgen belgisiz bireýler keshke dúkenge basa-kóktep kirip, qarýmen qorqytý arqyly barlyq aqshany tartyp áketken.
Qylmystardyń uqsastyǵyn eskerip, tártip saqshylary bul shabýyldardy bir qylmystyq top isteýi múmkin degen boljam jasaıdy.
«Eń tájirıbeli qyzmetkerlerden qurylǵan jedel-tergeý toby qaraqshylyq jasady degen kúdikke ilingen jergilikti úsh turǵyndy ustady. Qazirgi ýaqytta olardyń ekeýi qamaýǵa alyndy», - dedi Qapshaǵaı qalasy Polıtsııa bóliminiń bastyǵy Eldar Ábdikenov.
Іs-shara barysynda kúdiktilerden qylmys jasaǵanda paıdalanylýy múmkin tapansha jáne ózge jeke zattar tálkilendi jáne is materıaldaryna aıǵaqzat retinde tirkeldi.
«Bul is boıynsha QR Qylmystyq kodeksiniń 192-babyna sáıkes sotqa deıingi tergeý amaldary júrgizilýde. Kúdiktilerden tálkilengen qarý saraptamaǵa jiberildi. Kúdiktilerdiń óńirdegi osyǵan uqsas ózge de qylmystarǵa qatysy bary anyqtalyp jatyr», - dep atap ótti polıtsııa ókili.
Aıta keteıik, atalǵan vedomstva taratqan aqparatqa sáıkes, ustalǵan kúdiktilerdiń bireýi kámilet jasqa tolmaǵanyna baılanysty eshqaıda ketpeý týraly qolhatpen ata-anasyna tapsyrylǵan.
