Qapshaǵaıda 9 ret jol erejesin buzǵan júrgizýshi 30 kúnge qamaldy
TALDYQORǴAN. QazAqparat - Qapshaǵaıda 9 jol erejesin buzǵan júrgizýshi 30 kúnge qamalyp, 200 myń teńge aıyppul tóleıtin boldy. Sondaı-aq mas kúıde bolǵany úshin 9 jylǵa kólik basqarý quqyǵynan aıyryldy, dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, oqıǵa jaqynda Qapshaǵaı qalasynda bolǵan. 35 jastaǵy qala turǵyny tótenshe jaǵdaı tártibin buza otyryp, óziniń tanysynan memlekettik tirkeýden sheshilgen «Range Rover Vogue» markaly avtokóligin surap alǵan. Kólikke jalǵan tirkeý nómirin taǵyp, ony alkogoldik mas kúıde basqarǵan. Sondaı-aq, kólikti basqarý úshin qajetti saqtandyrýdyń bolmaǵany anyqtaldy.
«Qala kóshelerinde júrgende ustalǵan azamat baǵdarshamnyń qyzyl túsine qaramaı óte shyqqan. Tártip saqshylarynyń talabyna baǵynbaı, toqtamady. Polıtseılerdiń tekserýi úshin tıisti qujattaryn kórsetpeı jáne medıtsınalyq kýálandyrýdan da bas tartty»,- dedi Qapshaǵaı QPB patrýldik polıtsııa vzvodynyń komandıri Dıas Aınaqulov.
Quqyq buzýshy jasaǵan 9 zańsyz árekettiń árqaısysyna baılanysty ákimshilik hattama toltyryldy. Onyń bes deregi boıynsha aıyppul salynsa, tórt deregi boıynsha Qapshaǵaı qalalyq sotynyń qaýlysy qabyldandy. Atap aıtqanda, sotta 1985 jyly QR ÁQbK 476-babynyń 6-tarmaǵyn; 478-babyn; 590-babynyń 4-tarmaǵyn; 613-babynyń 4-tarmaǵyn buzǵany dáleldenip, sot sheshimimen quqyq buzýshy 30 táýlikke ákimshilik qamaldy. Sonymen qatar, sot sheshimimen ol 9 jylǵa kólik basqarý quqyǵynan aıyryldy.
«Quqyq buzýshy basqarǵan avtokólik arnaıy turaqqa toǵytyldy. Kólikti tek ıesi ǵana ala alady. Alaıda, ol salynǵan aıyppuldardy tolyq kólemde tóleýi tıis. Aıyppuldar somasy, shamamen 200 myń teńge bolady. Osyǵan oraı, barlyq júrgizýshilerden jol júrý erejesin qatań saqtaýdy jáne karantın tártibin buzbaýlaryńyzdy suraımyn»,- dedi patrýldik polıtsııa vzvodynyń komandıri polıtsııa aǵa leıtenanty Dıas Aınaqulov.
