Qapshaǵaıda 33 jumysshy jarty jyldan beri aılyqtaryn ala almaı júr
TALDYQORǴAN. QazAqparat - Qapshaǵaı qalasyndaǵy «Rıazanov atyndaǵy №25 Mostostroıtelnyı otrıad» JSSh-niń 33 jumysshysy 7 aıdan beri aılyqtaryn ala almaı júr, dep habarlaıdy QazAqparat tilshisi.
Qapshaǵaı qalalyq ákimdiginiń málimetinshe, atalǵan mekeme jumysshylardyń aldynda 6 500 000 teńge bereshek.
«Jumysshylar birneshe aıdan beri aılyq tólenbegendigin aıtyp ákimshilik mamandaryna shaǵym túsirdi. Osyǵan oraı, qala ǵımaratynyń kishi zalynda jıyn ótip, oǵan óńir basshysynyń orynbasarlary Saǵdat Shatanuly, Іlııas Seıtbekuly jáne atalmysh seriktestiktiń biryńǵaı personaldy basqarý qyzmettik bóliminiń basshysy Erjan Oralbaev qatysyp, kelgen azamattarǵa búginde atqarylyp jatqan jumystar jóninde aqparat berdi. Nátıjesinde bıylǵy jyldyń tamyz aıynyń sońyna deıin qaryz tolyqtaı tólenetin bolady. Mekeme bereshegi 6 500 000 teńge»,- delingen Qapshaǵaı qalasy ákiminiń baspasóz qyzmeti taratqan aqparatta.
Buǵan deıin aryzdanýshylar qala prokýratýrasyna, Almaty oblysynyń eńbek ınspektsııasyna talap-aryz jazǵan. Osyǵan baılanysty «Rıazanov atyndaǵy №25 Mostostroıtelnyı otrıad» JSSh-ne eki ret aıyppul salynǵan.
«Bul másele búgingi kúni oblystyń eńbek ınspektsııasynyń jáne qala ákimdiginiń qatań baqylaýynda. Sondaı-aq, joǵaryda kórsetilgen merzim ishinde seriktestik bereshegin ótemegen jaǵdaıda is ári sotqa joldanatyn bolady»,- dep tolyqtyrdy atalǵan vedomstvo qyzmetinen.
