Qapshaǵaıda 30-ǵa jýyq kópqabatty úı apatty jaǵdaıda

TALDYQORǴAN. QazAqparat - Almaty oblysyndaǵy Qapshaǵaı qalasynda 238 kópqabatty úı bolsa, sonyń 30-y apatty dep tanylǵan. Bul jóninde qala ákimi Talǵat Qaınarbekov brıfıng barysynda málim etti, dep habarlaıdy QazAqparat tilshisi.

Shahar basshysynyń sózinshe, 30 úıdiń ekeýi ótken jyly súrilip, 16 otbasy jańa baspanamen qamtylǵan. Apatty úılerdi súrý jumystary kezeń-kezeńmen júzege aspaq. Sondaı-aq T.Qaınarbekov Qapshaǵaıda jańa yqsham aýdandar salynatynyn aıtty. Máselen ótken jyly «Nurly jol» baǵdarlamasy aıasynda 4 joba júze asyp, jańadan boı kóteretin 3 shaǵyn aýdanǵa ınfraqurylym tartylǵan.

«Nurly jol» baǵdarlamasy aıasynda 2,8 mlrd teńge qarjy bólindi. «Arna 12a» «Arna 12v» yqsham aýdandarynyń ınfraqurylymy tolyqtaı jasaldy. Bolashaqta bul jerde úıler salynady, tamasha jańa aýdan boı kóteredi. Sondaı-aq atalǵan baǵdarlama aıasynda Qapshaǵaıdyń jylý qazandyǵy kúrdeli jóndeýden ótti»,  - dedi T.Qaınarbekov

Aıta ketý kerek, Qapshaǵaı qalasynda 45 myńnan asa halyq turady. Al baspana kezegindegilerdiń sany 2300-den asyp jyǵylady.