Qapshaǵaıda 11 jasar balany tok soǵyp, qalanyń elektr jelilerine tekserý júrgizilgeli jatyr
QONAEV. KAZINFORM – Osy jyldyń mamyr aıynda Qapshaǵaı sý qoımasynyń jaǵalaýynda 11 jasar balany tok soǵyp, ol kóz jumdy. Bul jaǵdaıǵa kim jaýapty jáne oqıǵadan keıin qandaı sharalar qolǵa alynbaq. Bul týraly Kazinform tilshisi anyqtap, bildi.
Elektr jelileri kimge tıesili ?
Marqum balanyń týysy buǵan deıin beıneúndeýde bala salbyrap turǵan symdy baıqamaı qalyp, ony tok soqqanyn aıtqan edi. Aıtýynsha, bul elektr jelileri jeke demalys aımaǵyna tıesili.
Alaıda demalys ornynyń ókilderi bul aqparat shyndyqqa janaspaıtynyn jáne qaıǵyly jaǵdaı olardyń aýmaǵynda emes, kórshi aýmaqta bolǵanyn málimdedi.
Qazirgi ýaqytta oqıǵanyń mán-jaıyn anyqtaý úshin tergeý júrip jatyr.
Qonaev qalasy ákiminiń orynbasary Jansultan Ońalbaevtyń Kazinform agenttigine bergen jaýabynda qaıǵyly oqıǵanyń Qapshaǵaı sý qoımasynyń soltústik jaǵalaýynda ornalasqan jekemenshik nysannyń №1 qurylys aımaǵynda bolǵany aıtylǵan.
— 2003 jylǵy shekaralardy bólý aktisine sáıkes, atalǵan aýmaqta ornalasqan elektr jelileri azamat T.-nyń menshiginde, ıaǵnı jelini kútip ustaý sol azamatyń moınynda, - dedi ákimniń orynbasary.
Qaıǵyly oqıǵadan keıin qandaı sharalar qolǵa alyndy ?
Qonaev qalasy ákimdiginiń málimetinshe, oqıǵadan keıin menshik ıesi jaqyn mańdaǵy elektr jelileri tirekterin qaýipsiz aımaqqa kóshirgen. Sonymen qatar shomylý maýsymy bastalǵaly beri jergilikti atqarýshy organdar Tótenshe jaǵdaılar departamentimen birlesip, jaǵalaý aımaqtaryn, onyń ishinde jeke demalys bazalaryn únemi aralap, tekserý jumystaryn júrgizip keledi. Demalys aımaqtarynyń ıelerimen jáne demalýshylarmen qaýipsizdik pen sanıtarlyq talaptardy saqtaý boıynsha túsindirý jumystary júrgizilip jatyr.
Qalaǵa qaraıtyn №5, №6 jáne №7 jaǵajaılarynda 36 qutqarýshy táýlik boıy kezekshilik etedi jáne beınebaqylaý kameralary ornatylǵan.
Jaqyn arada Qonaev qalasynyń ákimdigi barlyq jaǵalaý aımaqtarynda, sonyń ishinde jeke menshiktegi aýmaqtarda ınjenerlik ınfraqurylymnyń, onyń ishinde elektr jelileriniń tehnıkalyq jaı-kúıin jospardan tys keshendi teksermek. Oǵan ýákiletti organdar men elektr energetıkasy salasyndaǵy mamandar tartylady.
Qara jamylǵan otbasyǵa kómek
Qaza bolǵan balanyń otbasyna kómek kórsetile me?. Bul suraqqa Jansultan Ońalbaev bala Almaty qalasynyń turǵyny jáne sol jerde tirkelgen bolǵandyqtan, Qonaev ákimdigi tarapynan kómek kórsetý qarastyrylmaǵanyn aıtty.
Sý aıdyndaryndaǵy qaýipsizdik
Almaty oblysynyń Tótenshe jaǵdaılar departamenti jaz mezgilinde, ásirese kámeletke tolmaǵandar arasynda, sý aıdyndaryndaǵy qaýipsizdikti qamtamasyz etý boıynsha keshendi aldyn alý sharalary júzege asyrylyp jatqanyn habarlady.
TJD bastyǵynyń orynbasary Ermek Mombaevtyń aıtýynsha, shomylý maýsymy bastalar aldynda arnaıy is-sharalar jospary bekitilgen. Osy josparǵa sáıkes reıdter kún saıyn, tipti túnde de ótkiziledi. Bul jumystarǵa departament, áskerı bólim qyzmetkerleri jáne eriktiler jumyldyrylǵan. Monıtorıng úshin jylý kameralary men daýys zoraıtqyshtarmen jabdyqtalǵan ushqyshsyz ushý apparattary (drondar) paıdalanylady. Demalys jáne mereke kúnderi aldyn alý sharalary kúsheıtiledi.
Bıyl oblys boıynsha shomylý ruqsat etilgen 7 kommýnaldyq jáne 96 jeke jaǵajaı jumys istep tur. Sonymen qatar 87 qaýipti ýchaskede 100-den astam eskertý belgisi ornatylǵan. Qapshaǵaı sý qoımasyndaǵy kommýnaldyq jaǵajaılarda beınebaqylaý kameralary ornatylyp, tikeleı ortalyq dıspetcherlik pýnktke qosylǵan.
Aıyppul men eskertýler
2025 jyldyń basynan beri sý aıdyndaryndaǵy qaýipsizdik erejelerin buzǵany úshin 46 adam ákimshilik jaýapkershilikke tartylyp, jalpy somasy 633 052 teńge aıyppul salynǵan. Sonymen qatar shaǵyn kólemdegi kemelerdi paıdalaný erejelerin buzǵan jáne tirkeýsiz jumys istegen kásipkerler anyqtalyp, olarǵa da aıyppul salynǵan.
Odan bólek qoǵamdyq oryndarda mas kúıinde júrgeni jáne ishimdik ishkeni úshin 38 adam polıtsııa tarapynan jaýapqa tartyldy.
Infraqurylym qaýipsizdigi
Agenttik saýalyna jaýap bergen Tótenshe jaǵdaılar departamenti elektr jelileriniń jaı-kúıi tekserý departament quzyretine kirmeıtinin habarlady. Alaıda qaýipsizdikke qatysty zańbuzýshylyqtar anyqtalǵan jaǵdaıda, ýákiletti organdar men ákimdikterdiń qatysýymen arnaıy komıssııalyq tekserýlerge TJD mamandary qatysady.
— Jaǵajaılar men kópshilik demalys oryndaryna jaqyn ornalasqan elektr jelileriniń, transformatorlyq qosalqy stansalardyń, áýe jáne kabel jelileriniń tehnıkalyq jaǵdaıyna josparly jáne jospardan tys tekserýler júrgiziledi. Zańbuzýshylyqtar anyqtalǵan jaǵdaıda ýákiletti organdar tıisti nusqamalar berip, apatty ýchaskelerdiń jumysyn toqtatyp, nysan ıelerimen túsindirý jumystaryn júrgizedi, — dedi Ermek Mombaev.
Sonymen qatar TJD málimetinshe, shomylý maýsymyna daıyndyq aıasynda halyq kóp jınalatyn demalys oryndary men balalar jazǵy lagerleriniń janyndaǵy sý aıdyndarynyń túbin tazalaý jáne tekserý jumystary júrgizilgen. Qazirgi ýaqytta 41 demalys orny tekserilgen. Alaıda TJD ókili jekemenshik nysandardaǵy elektr jelileri men ınfraqurylymdy tekserý tek menshik ıesiniń ótinishimen nemese kelisimimen ǵana júzege asyrylatynyn túsindirdi.
Qaıǵyly oqıǵalardyń statıstıkasy
2024 jyly oblys aýmaǵyndaǵy ruqsat etilmegen oryndarda 15 adam sýǵa ketken, onyń 12-si — Qapshaǵaı sý qoımasynda. 2023 jylmen salystyrǵanda qaıǵyly jaǵdaılardyń sany 21%-ǵa azaıǵan, sondaı-aq balalar ólimi tirkelmegen.
Búgingi kúni sý qoımalaryndaǵy qaýipsizdikti qamtamasyz etý úshin 13 qutqarý beketi jumys istep tur. Bul beketterde 70-ten astam qyzmetker, 31 júzý quraly jáne 45 sýasty qural-jabdyqtary bar. Budan bólek 47 qoǵamdyq qutqarýshy arnaıy daıyndyqtan ótken.
Eske salaıyq, buǵan deıin Qonaevtaǵy demalys aımaǵynda tok soqqan 11 jasar bala qaıtys bolǵanyn jazǵanbyz. Bul derek boıynsha Qonaev qalasynyń polıtsııa basqarmasy Qazaqstan Respýblıkasy Qylmystyq kodeksiniń 306-babynyń 3-bóligi boıynsha qylmystyq is qozǵady.