Qapshaǵaı jaǵajaılaryna beınebaqylaý kameralary ornatyldy
ALMATY. KAZINFORM – Qonaev qalasyndaǵy jaǵajaılar qatań baqylaýǵa alyndy.
Qonaev qalasy ákimdiginiń málimetinshe, №6 jaǵajaıda 40 kásipkerlik nysan jumys isteıdi. Barlyǵy senimgerlik basqarýshy kompanııamen kelisimshart jasap, jalǵa alǵan aýmaqty kútip ustaý boıynsha naqty mindettemelerdi alǵan.
Olar kún saıyn tazalyq jumystaryn júrgizýge, tapshandardy dezınfektsııalaýǵa, qoqys jáshikteri men jaryq ornatýǵa, sondaı-aq qaýipsizdikti qamtamasyz etýge mindetti.
– №6 jaǵajaıda 45 qoqys jáshigi, 10 konteıner jáne úsh ájethana ornatylǵan. Tazalyqqa 30 jumysshy men 2 arnaıy tehnıka jaýapty. Qaýipsizdikti 10-nan astam qutqarýshy qamtamasyz etip otyr, medıtsına qyzmetkerleri kezekshilik etedi, beınebaqylaý kameralary ornatylǵan. Monıtorıng kún saıyn júrgiziledi, — dep habarlady qalalyq TÚKSh bóliminen.
Jaǵajaı aýmaǵynda tártipti saqtaý jáne tótenshe jaǵdaılardyń aldyn alý maqsatynda TJB men polıtsııa qyzmetkerleri turaqty túrde kezekshilik atqarady. Kún saıyn jaǵajaılarǵa 4–7 myń adam keledi. Demalys kúnderi bul kórsetkish ár jaǵajaıda 2–3 esege deıin artady.
Sanıtarııalyq-epıdemıologııalyq baqylaý basqarmasynyń basshysy Narıman Orynbasarulynyń aıtýynsha, Qapshaǵaı sý qoımasynan aı saıyn sý synamasy alynyp, zerthanalyq saraptamalar júrgiziledi.
– Qorytyndysy - qanaǵattanarlyq, sý sanıtarlyq talaptarǵa saı keledi, shomylýǵa ruqsat, – dedi ol.
Jaǵajaı maýsymy bastalǵaly qoǵamdyq oryndardy lastaǵany úshin QR ÁQBtK 434-2-baby boıynsha 35 ákimshilik hattama toltyrylyp, azamattarǵa jalpy somasy 1 376 200 teńge aıyppul salynǵan.
Buǵan deıin Qapshaǵaıda jańa jaǵajaılar ashylatyny týraly jazǵanbyz.