Qapshaǵaı turǵyndary karantın kezinde pıknık uıymdastyrǵan
TALDYQORǴAN. QazAqparat - Qapshaǵaı turǵyndary karantın kezinde pıknık uıymdastyryp, ustaldy, dep habarlaıdy QazAqparat tilshisi.
Almaty oblystyq Polıtsııa Departamenti baspasóz qyzmetiniń málimetinshe, olarǵa TJ rejımin buzǵany úshin ákimshilik hattama toltyryldy.
«Ótken keshte qyzmet kórsetiletin ýchaskeni patrýldeý kezinde halyq arasynda «Kartodrom» dep atalatyn jumys istemeıtin kásiporyndardyń biriniń aýmaǵynan shyqqan qatty mýzyka bizdiń nazarymyzdy ózine aýdardy. Qorshaý ishine kirgen biz qatty mýzykamen kóńil kóterip júrgen jastar tobyn kórdik, olardyń arasynda balalar da bar. Tótenshe jaǵdaı kezeńinde jappaı is-sharalarǵa tyıym salynǵanyna qaramastan, bul jerde týǵan kún atap ótilip jatqandyǵy belgili boldy. Tártip buzýshylar óz kinásin túsinip, saltanatty sharanyń uıymdastyrýshysy keshirim surady», - dedi patrýldik polıtsııa vzvod komandıri polıtsııa aǵa leıtenanty Dıas Aınaqulov.
Uıymdastyrylǵan pıknıkke qatysqan bes eresek azamatqa qatysty polıtsııa qyzmetkerleri QR ÁQBtK-niń 476-babyna sáıkes ákimshilik hattama toltyryp, ony sotqa joldady.
«Karantın jarııalanǵan ýaqyttan bastap Qapshaǵaı qalalyq polıtsııa bóliminiń qyzmetkerleri tótenshe jaǵdaı rejımin buzǵan 139 quqyq buzýshyny ákimshilik jaýapkershilikke tartty, onyń ishinde alty zańdy tulǵa da bar. Sonymen qatar, QR ÁQBtK-niń 478-babynda kózdelgen tótenshe jaǵdaı kezinde quqyq tártibin buzýǵa ıtermeleıtin bir is-áreket te anyqtaldy»,- dep tolyqtyrdy Dıas Aınaqulov.
