Qapshaǵaı sý qoımasynan japondyq asshaıan tabyldy
QR AShM orman sharýashylyǵy jáne janýarlar álemi komıtetiniń baspasóz hatshysy Sáken Dildahmet Feısbýktegi paraqshasynda jarııa etkendeı, «QazUZI balyq sharýashylyǵy» JShS ǵalymdary sý qoımasynan halyq «japon asshaıany» dep atap ketken shaıandardyń jańa túrin anyqtaǵan.
«Japon asshaıany alǵash ret Qapshaǵaı sý qoımasynyń joǵarǵy jaǵynan (Іle ózeniniń saǵasynda) 2009-2010 jyldary tabylǵan edi. Shaıannyń bul túriniń dene uzyndyǵy - 10 sm-ge deıin. Al buryn rezervýarda meken etetin asshaıandardyń uzyndyǵy 5-6 sm-den aspaıtyn», - dep jazady ol.
Ádette, atalmysh asshaıannyń meken etý oryndary - Japonııa, Qytaı, Koreıa, Vetnam jáne Reseı sý qoımalary.
AShM ókiliniń aıtýyna qaraǵanda, atalmysh asshaıannyń dámi til úıiretindikten, adamdar ony jappaı aýlaýdy kásipke aınaldyrǵan. Ásirese, Azııanyń ońtústik-shyǵysynda bul sharýashylyq erekshe damyǵan kórinedi.
«Bizge jaqyn aýdandarda qytaılyq tabıǵı resýrstardy paıdalanýshylar osy asshaıandy ósiretin bolýy kerek. Sodan baryp japon asshaıany osy sý qoımasyna jetken. Sońǵy ýaqytqa deıin biz sý qoımasynda irileý asshaıandardyń kóptep taralmaýyna aýa raıy jaǵdaıy sebep bolýy múmkin degen oıda edik. Biraq 2018 jyly alynǵan ǵylymı qorytyndylar iri asshaıandar sý qoımasynda taralyp qana qoımaı, jyrtqysh kókserkelerdiń azyǵyna aınala alatynyn kórsetti. Osyǵan oraı, asshaıandar sý qoımasyndaǵy ekojúıede óz ornyn alady», - deıdi Sáken Dildahmet.
