Qapshaǵaı sý qoımasynda óreskel ereje buzǵan gıdrotsıklder tárkilendi

QONAEV. KAZINFORM – Qapshaǵaı sý qoımasynda sýdaǵy qaýipsizdikti qamtamasyz etý jáne quqyqbuzýshylyqtardyń aldyn alý maqsatynda vedomstvoaralyq reıd ótti.

Qonaev ákimdiginiń málimetinshe, reıd barysynda qutqarý quraldarynsyz shaǵyn kemelerde júrý deregi boıynsha 8 ákimshilik hattama, sondaı-aq shaǵyn kemelerdi basqarý quqyǵynyń bolmaýyna baılanysty 9 hattama rásimdelgen.

Odan bólek erejeni óreskel buzǵany úshin 3 gıdrotsıkl tárkilenip, aıyp turaǵyna qoıyldy.

- Sýdaǵy qaýipsizdik erejelerin saqtamaý ákimshilik jaýapkershilikke ǵana emes, qaıǵyly jaǵdaılarǵa alyp kelýi múmkin. Qutqarý jıletterin paıdalaný, qujattardyń bolýy jáne belgilengen talaptardy saqtaý — qaýipsizdiktiń kepili, - dep habarlady ákimdikten.

Eske salaıyq, buǵan deıin Qonaev qalasynyń jańarǵan jaǵajaıyna kúnine 2 myń adam keletinin jazǵanbyz.