Qapshaǵaı sý qoımasy sońǵy 10 jylda alǵash ret 100%-ǵa toldy
ALMATY. KAZINFORM - Almaty oblysyndaǵy Qapshaǵaı sý qoımasy sońǵy 10 jylda alǵash ret 18 mlrd tekshe metrden artyq sý jınap, 100%-ǵa toldy. Sý qoımasy Qytaı aýmaǵynan bastaý alatyn transshekaralyq Іle ózeniniń sýyn jınaıdy. Bıyl kóktemde sekýndyna 900 tekshe metrge deıin sý kelgen.
Mamandar munyn sebebin Tıan-Shan muzdyqtarynyń erýi men jaýyn-shashynnyń kóp bolýymen baılanystyrady.
«Qapshaǵaı sý qoımasy sońǵy ret 2014 jyly 100%-ǵa tolǵan bolatyn. Sýarý maýsymy bastalǵaly Sheńgeldi alqabynyń 6 myń gektar jáne Aqdala alqabynyń 28 myń gektar jerine sý berilýde. Búgingi tańda sharýalardyń suranysy boıynsha sekýndyna 750 tekshe metr sý jiberilip jatyr», - dedi Balqash-Alakól basseındik ınspektsııasy basshysynyń orynbasary Medet Kerimjanov.
Qazir Qapshaǵaı sý qoımasynda 16 mlrd 200 mln tekshe metr sý bar. Oblysta vegetatsııa kezeńi qyrkúıektiń sońyna deıin jalǵasady. Odan keıin sý tasqyny kezeńine daıyndyq bastalady.
Aıta ketý kerek, Sý resýrstary jáne ırrıgatsııa mınıstrligi Qazaqstan men Qytaı arasyndaǵy transshekaralyq ózenderdiń sýyn bólý máselesi boıynsha úkimetaralyq kelisim jobasyn ázirlep jatyr. Onyń ishinde úsh iri transshekaralyq ózen: Ertis, Іle jáne Emel bar. Búginde taraptar sý bólý máselesi boıynsha kelisimniń birqatar baptary boıynsha ortaq mámilege keldi.
Osyǵan deıin Qapshaǵaı jaǵajaılarynan kúnine 100 tonnaǵa jýyq qoqys shyǵarylatyny týraly jazdyq.
