Qapshaǵaı sý qoımasy ekinshi jyl qatarynan 100% toldy

ASTANA. KAZINFORM — Qazirgi tańda Almaty oblysyndaǵy Qapshaǵaı sý qoımasynda shamamen 18,5 mlrd tekshe metr sý jınaldy. Byltyr sý qoımasy sońǵy 10 jylda alǵash ret 100%-ǵa tolǵan bolatyn. Bul týraly Sý resýrstary jáne ırregatsııa mınıstrligi málim etti.

 Sý qoımasynyń tolýy oblystaǵy Aqdala jáne Sheńgeldi sýarmaly alqaptaryn sýmen tolyqtaı qamtýǵa múmkindik beredi. Qapshaǵaı sý qoımasy Іle ózeniniń sý aǵynyn rettep otyrady. Jyl basynan beri sý qoımasynan Balqash kóline 3,8 mlrd tekshe metr sý jiberildi. Al byltyr osy kezeńde bul kólem 2,9 mlrd tekshe metr bolǵan edi. Sýdyń mol berilýiniń arqasynda bir jyldyń ishinde Balqash kóliniń deńgeıi 12 santımetrge kóterilip, Baltyq júıesi boıynsha 341,52 metrden 341,64 metrge jetti. Al kóldegi sý kólemi 2 mlrd tekshe metrge ulǵaıdy.

— Sý resýrstary jáne ırrıgatsııa mınıstrligi transshekaralyq ózenderge, sonyń ishinde Іle ózenine qatysty máseleler boıynsha qytaılyq áriptesterimen turaqty baılanysta. Birlesken jumystyń arqasynda qatarynan ekinshi jyl boıy Almaty oblysynyń dıqandary sýarmaly sýmen tolyq qamtamasyz etilip otyr. Sonymen qatar Balqash kóli basseınindegi ekologııalyq jaǵdaı da jaqsaryp keledi, — dedi Balqash-Alakól basseındik ınspektsııasynyń basshysy Serik Meırambekov.

Eske sala keteıik, buǵan deıin Qonaev turǵyny Qapshaǵaı sý qoımasyna motor maıyn tógip, qylmystyq jazaǵa tartylǵan bolatyn.