Qapshaǵaı, Shelek, Esik jáne Uzynaǵash Almaty úshin kontrmagnıt qalalarǵa aınalýy tıis - A. Esimov
ALMATY. QazAqparat - Búgin Almatynyń sáýlet-jobalaý qaýymdastyǵynyń ókilderi qala basshysy Ahmetjan Esimovti 2030 jylǵa deıingi qala qurylysy Bas josparynyń kezeńaralyq Tujyrymdamasymen tanystyrdy.
Bul týraly Almaty qalasy ákiminiń baspasóz qyzmetinen habarlady.
Jobalar Almaty aýmaǵynyń keńeıýine baılanysty Bas josparǵa túzetýler engizile otyryp usynyldy. Jobalardy jasaýshylar kontrmagnıt qalalar qurý, qoǵamdyq kólikterdiń qoljetimidiligin arttyrý, magıstraldy kósheler men joldar qurylysy, jyldam júretin kólik túrleri qozǵalysynyń syzbasyn jasaý jáne abattandyrý máselelerine baılanysty ońtaıly sheshimder usyndy.
Qala basshysy erekshe qala qurylysy aımaqtary Bas jospardy eskere otyryp jasalýy tıis ekendigin jetkizdi. Onyń aıtýynsha Qapshaǵaı, Shelek, Esik jáne Uzynaǵash qalalary Almaty úshin kontrmagnıt qalalarǵa aınalýy tıis, ıaǵnı mıgratsııalyq lekti retteýde mańyzdy rol atqarady. Óıtkeni olar Almatydan alshaqta ornalasqan.
«Keıbir kontrmagnıtter Almaty shekarasynyń syrtynda ornalasqan. Biraq shyn mánisinde qalaǵa jalǵasyp ketken dese de bolady. Sondyqtan Bas josparda qaladan jyraq jatqan kontrmagnıtter de eskerilýi tıis. Almaty oblysynyń ákimdigine de bul máselelerdi barynsha jiti qadaǵalaý usynylady. Óıtkeni, ol jerlerde beı-bereket qurylys jumystary júrip jatyr. Olardy toqtatyp, atalǵan eldi mekenderdiń bas josparlaryn qarap shyqqan jón. Óıtkeni olar tipti eskerilmeıdi», - dedi Ahmetjan Esimov.
Shara sońynda Almaty ákimi sáýletshilerge aıtylǵan usynystar men eskertpelerdi eskere otyryp, jobalardy qaıta tolyqtyryp jasaýdy tapsyrdy. Negizinen, jobalarda tıisti ınfraqurylymdar, «jasyl aımaqty» ulǵaıtý, qoǵamdyq kóliktiń qoljetimdi bolýy josparlanýy qajet.
Bulardan ózge, qala basshysyna 2015-2020 jyldarǵa arnalǵan «Eski úı» ınvestıtsııalyq baǵdarlamasynyń aldyn ala jasalǵan jobasy da kórsetildi.
Esterińizge sala ketelik, 2012 jyldyń aqpan aıynda «Almaty qalasy aýmaǵynda 2012-2015 jyldary eski úılerdi súrý» qalalyq baǵdarlamasy bekitilgen bolatyn. Bul joba ózin turǵyn úı qoryn jańartýdyń tıimdi ádisi retinde kórsete bildi, Sondyqtan jobany odan ári jalǵastyrý jóninde sheshim qabyldandy.
